Apple Úndistannan Reseıge iPhone satylsa, aıyppul salatynyn eskertti
ASTANA.KAZINFORM — Apple-diń resmı dıstrıbıýtorlary Úndistandaǵy bólshek saýda dúkenderin jańa modelder ımporttalǵannan keıin 90 kún ishinde sheteldik SIM-kartamen aktıvtelgen iPhone úshin qatań aıyppuldar salynatyny týraly habardar etti, dep jazdy RBK.
Bul týraly MoneyControl úndi basylymy dıstrıbıýtorlardyń satýshylarǵa joldaǵan resmı hatyna silteme jasap habarlady.
MoneyControl analıtıkterdiń esebine súıene otyryp, qazan aıynda Úndistannan iPhone eksporty 1,6 mlrd dollarǵa jetkenin jazady. Bul eldiń smartfon eksporty kóleminiń úshten bir bóligi jáne jalpy elektronıka eksportynyń 40%-yna teń.
Sarapshylardyń baǵalaýynsha, Úndistannan eksporttalatyn tehnıkanyń 3–5%-y beıresmı arnalar arqyly jóneltiledi, onyń shamamen jartysy Reseıge tıesili. Basqa negizgi naryqtarǵa Afrıka, Taıaý Shyǵys jáne Ońtústik-Shyǵys Azııa kiredi. Bul óńirlerde suranys ta, paıda da joǵary, deıdi analıtıkter.
Ereje ásirese jańa — iPhone 17 serııasynyń satylymyna qatysty. Basylymnyń málimetinshe, dıstrıbıýtorlar Apple ónimderiniń kompanııa resmı jumys istemeıtin elderge jetkizilýin shekteý úshin saıasatty ózgertip jatyr.
Hatta bylaı delingen:
— Eger 90 kúndik merzim ishinde sizdiń dúkenińiz satqan kez kelgen iPhone qurylǵysy sheteldik SIM-kartamen belsendirilgeni anyqtalsa, dúkenge qomaqty aıyppul salynyp, dúken kody kompanııa saıasatyna sáıkes buǵattalýy múmkin.
Hatta bul resmı eskertý ekeni de atap ótilgen.
Apple men onyń seriktesteri buryn da parallel eksport qaýpi týraly eskertken. Alaıda sońǵy habarlama kompanııanyń óz jetkizý arnalaryn turaqtandyrýǵa umtylýyna baılanysty áldeqaıda qatań ustanymdy kórsetedi, deıdi MoneyControl derekkózderi.
2025 jyldyń toǵyz aıynda Apple-diń iPhone satylymynan túsken tabysy 209,6 mlrd dollardy qurady — bul ótken jylmen salystyrǵanda 4%-ǵa kóp. Kompanııanyń jalpy kirisi 416,2 mlrd dollar boldy (+6%).
Apple Reseıge ónim jetkizýdi áskerı operatsııa bastalǵannan keıin toqtatty. Sonymen qatar kompanııa Apple Pay jáne basqa da servısterdi qoldaný múmkindigin shektedi. Sodan beri qurylǵylar elge parallel ımport jáne jeke ákelý arqyly jetkizilýde. Kóptegen memleketter Apple elektronıkasyn Reseıge shyǵarýǵa tyıym salmaıdy.
iPhone smartfondary áli de kóptegen reseılik ınternet-dúkender men oflaın saýda oryndarynda satylady. Jańa modelder de qoljetimdi: iPhone 17 serııasy reseılik naryqta resmı satylym bastalǵannan birneshe apta ótken soń paıda boldy. Al aldyn ala tapsyrys resmı tanystyrý kúni-aq ashylǵan.
MTS jáne basqa operatorlardyń derekteri boıynsha, 2025 jyldyń qarashasynda Apple smartfondary Reseıdiń uıaly baılanys jelisinde eń kóp tirkeletin qurylǵylardyń biri bolǵan.
Aıta keteıik, Apple Qytaıdaǵy ınvestıtsııa kólemin ulǵaıtpaqshy.