Apple kompanııasy iPhone óndirisin Qytaıdan Úndistanǵa shuǵyl kóshirip jatyr
Amerıkalyq Apple kompanııasy Qytaıdaǵy óndirisin Úndistanǵa kóshirý úderisin aıtarlyqtaı jedeldetti. Bul týraly Lianhe Zaobao basylymy habarlady.
Bloomberg agenttiginiń habarlaýynsha, 2024 jyldyń naýryzyna deıin Úndistanda 22 mıllıard dollardyń iPhone smartfondary qurastyrylǵan, bul ótken jylmen salystyrǵanda shamamen 60%-ǵa kóp.
Apple qazirgi tańda iPhone qurylǵylarynyń 20%-yn (árbir besinshi telefon) Úndistanda shyǵarady. Bul kórsetkishter iPhone óndirýshisiniń jetkizýshilerimen birge Qytaıdan Úndistanǵa júıeli kóshý úrdisin kúsheıtip jatqanyn kórsetedi. Mundaı baǵyt pandemııa kezinde Qytaıdaǵy qatań shekteýlerge baılanysty týyndaǵan óndiristik úzilisten keıin bastalǵan.
Qazirgi ýaqytta Úndistanda óndiriletin iPhone-dardyń kópshiligi eldiń ońtústiginde ornalasqan Foxconn zaýytynda qurastyrylady.
Apple kompanııasy bul máselege qatysty resmı túsinikteme bergen joq.
Úndistannyń tehnologııa mınıstri ótken aptada (8 sáýir) málimdegendeı, el 2025 jyldyń naýryzyna deıin 1,5 trıllıon rýpııge teń iPhone eksporttaǵan. Derekkózderdiń aıtýynsha, AQSh prezıdenti Donald Tramptyń aqpanda jarııalaǵan «teńestirilgen keden salyǵy» bastamasynan keıin, Úndistannan AQSh-qa iPhone jetkizilimi aıtarlyqtaı jyldamdaǵan.
11 sáýirde Tramp ákimshiligi smartfondar men kompıýterlerdi qosa alǵanda birqatar elektronıka ónimderin kedendik baj salyǵynan bosatý týraly sheshim qabyldady. Bul Apple men NVIDIA sııaqty kompanııalar úshin oń jańalyq boldy. Alaıda bul sheshim Qytaıǵa baǵyttalǵan negizgi tarıfterge áser etpeıdi — Qytaıǵa salynǵan jıyntyq baj salyǵy qazirgi tańda 145%-ǵa jetken.
Sonyń nátıjesinde, qazirgi kezde Úndistanda óndirilgen iPhone qurylǵylaryna AQSh-ta eshqandaı qosymsha salyq salynbaıdy. Al Qytaıdan eksporttalatyn ónimderge salynatyn joǵary tarıfter Apple sekildi kompanııalardy óndiristik tizbekti balama naryqtarǵa kóshirýge ıtermeleýi múmkin.
Buǵan deıin Apple kompanııasy Indonezııada iPhone 16 smartfondaryn satýǵa qaıta ruqsat alǵanyn jazǵan bolatynbyz.