Apple Qytaıdaǵy komıssııalaryn azaıtady

ASTANA. KAZINFORM – Apple kompanııasy Qytaıdaǵy App Store dúkenindegi qoldanba ishindegi satyp alýlar úshin alynatyn komıssııa tólemderin 2026 jyldyń 15 naýryzynan bastap azaıtady, dep habarlaıdy Kazinform agenttiginiń Beıjińdegi tilshisi Sınhýa agenttigine silteme jasap.

Qytaılyq retteýshiler men amerıkalyq korporatsııa arasynda osyǵan qatysty kelisimge qol jetkizildi. Jańa sharttar boıynsha qoldanba ishindegi satyp alýlar men aqyly qoldanbalar úshin standartty komıssııa 30%-dan 25%-ǵa deıin tómendetiledi. 

Shaǵyn bıznes jáne shaǵyn qoldanbalar seriktestik baǵdarlamalaryna qatysýshylar úshin qoldanba ishindegi satyp alýlar men jazylymdardy avtomatty túrde jańartý úshin komıssııalar birinshi jyldan keıin 15%-dan 12%-ǵa deıin tómendetiledi.

Apple barlyq ázirleýshi úshin ádil jáne ashyq sharttardy saqtaýǵa nıetti ekenin jáne Qytaıda qoldanbalardy taratatyn ázirleýshiler úshin basqa naryqtardaǵy jalpy komıssııa deńgeıinen aspaıtyn básekege qabiletti App Store tarıfterin únemi usynatynyn málimdedi.

Biz buǵan deıin Apple kompanııasy Qytaıdaǵy ınvestıtsııalaryn arttyratynyn habarlaǵan edik.