Apple Qytaı naryǵyndaǵy ónimderine jergilikti JI modelderin engizdi
ASTANA. KAZINFORM — Apple Qytaı naryǵyna arnalǵan smartfondarynda jasandy ıntellekt fýnktsııalaryn paıdalanýǵa ruqsat aldy. Kompanııa qurylǵylardyń jelilik qujattamasyna JI modelderiniń tirkeý nómirlerin engizgen, dep habarlaıdy Kazinform agenttiginiń Beıjińdegi menshikti tilshisi jergilikti BAQ-qa silteme jasap.
QHR Ónerkásip jáne aqparattyq tehnologııalar mınıstrliginiń jańartylǵan qujattaryna sáıkes, Apple-diń alǵashqy jınalmaly smartfony iPhone Duo men ózge de qurylǵylarynyń tizilimine úsh JI modeli engizilgen. Olardyń qatarynda Apple kompanııasynyń Apple Intelligence júıesi jáne Alibaba kompanııasynyń Tongyi Wanxiang pen Tongyi Qianwen servısteri bar.
JI algorıtmderiniń tirkelýi Apple kompanııasynyń Qytaı naryǵynda jasandy ıntellekt servısterin tolyqqandy iske qosýyna jol ashty.
Qytaıdyń retteýshi organdary bul ózgeristerdi 29 qyrkúıekte maquldady. Tirkeý nómirleri jınalmaly iPhone Duo-men qatar, iPhone 18 Pro, iPhone 17 Pro jáne iPhone Air smartfondarynyń qujattaryna da engizildi.
Shilde aıynda Qytaıdyń Kıberkeńistik basqarmasy Apple qurylǵylarynda Apple Intelligence júıesin paıdalanýǵa ruqsat berdi. Al Alibaba kompanııasy generatıvti fýnktsııalar men mýltımedıalyq kontentti óńdeýge múmkindik beretin Qwen neırojelisiniń Apple operatsııalyq júıelerine engizilgenin rastady. Bul múmkindikterdi paıdalaný úshin qosymsha bógde qoldanbalardy ornatýdyń qajeti joq.
Jınalmaly iPhone Duo smartfonynyń Qytaıdaǵy satylymy 23 qazanda bastalady. Bastapqy baǵasy — 15 999 ıýan (shamamen 2 387 AQSh dollary).
Buǵan deıin Apple alǵashqy búktelmeli iPhone-yn tanystyrǵanyn habarlaǵan edik.
