Apple keısi: Elimizde monopolııaǵa qarsy ujymdyq shaǵym tetigi iske qosylady

ASTANA. KAZINFORM – Budan bylaı monopolısterdiń áreketinen tutynýshylar shyǵynǵa batsa, aıyppul ǵana salynyp qoımaı, halyqqa ótemaqy tólenedi. Básekelestikti qorǵaý jáne damytý agenttigi tóraǵasynyń birinshi orynbasary Rýstam Ahmetov Májiliste salany retteıtin zań jobasyn tanystyra otyryp, osyndaı málimet aıtty.

- Biz tutynýshylardyń shyǵynyn ótep berýdiń keısterin usynyp otyrmyz. Mysaly, áýe bıletteri boıynsha bıýdjetke 876 mln teńge aıyppul túsken. Suıytylǵan gaz ben dári-dármek naryǵyndaǵy zertteýlerimiz bizge ujymdyq shaǵym ınstıtýty arqyly on myńdaǵan tutynýshylardyń atynan talap qoıyp, atalǵan somalardy tutynýshylarǵa tikeleı baǵyttaýǵa múmkindik beredi.

Bolashaqta biz qoldanamyz dep otyrǵan keısterdiń halyqaralyq balamalary bar. Mysaly, Apple-niń ústinen iPhone jumysy baıaýlaǵany úshin halyqaralyq ıýrısdıktsııalarda ujymdyq shaǵymdar qozǵalyp, ár tutynýshyǵa 25 dollardan shyǵyn ótemaqysy berildi. Bizde de osyndaı quqyqtyq ınstıtýt qurylady, - dedi Rýstam Ahmetov. 

Agenttik ókili aıtyp otyrǵan tetik – Ujymdyq shaǵym ınstıtýty. Zań jobasynda bul tetiktiń yqpal aıasyn keńeıtý josparlanǵan.

- Ujymdyq shaǵymdar tetigin iske qosý kózdelip otyr. Keıingi eki jylda Qazaqstan bıýdjetine monopolııaǵa qarsy aıyppuldar túrinde 11 teńgeden astam aqsha tústi. Ókinishke qaraı tutynýshylarǵa bir de bir teńge baǵyttalǵan joq. Bul jerde halyqaralyq tájirıbe negizinde ujymdyq shaǵymdar tetigin engizý usynylyp otyr. Bul tetiktiń qazir qoldanylyp júrgen normalardan aıyrmashylyǵy qandaı? Basty aıyrmashylyq tutynýshylarǵa kelgen shyǵyndy ótep berýge baǵyttalatynynda. Qazir ujymdyq shaǵymdar zańdaǵy qaıshylyqty joıý úshin ǵana beriledi, - dedi agenttik tóraǵasynyń orynbasary. 

Buǵan deıin elimizde Tutynýshylardyń quqyǵyn qorǵaý salasynda ombýdsmen ınstıtýty engiziletinin jazǵan edik.