Apple qaıtadan álemdegi eń qymbat kompanııa atandy
ASTANA. KAZINFORM – Dúısenbide Apple naryqtyq kapıtaldandyrý boıynsha Nvidia-ny basyp ozyp, 2025 jyldyń sáýirinen beri alǵash ret álemdegi eń qymbat kompanııa atandy, dep habarlaıdy CNBC.
Jartylaı ótkizgishter ázirleýshi jáne jobalaýshy Nvidia kompanııasynyń aktsııalary dúısenbide 5%-ǵa arzandap, kompanııanyń qunyn 4,77 trln dollarǵa deıin tómendetti. Bul ınvestorlardyń jasandy ıntellekt ınfraqurylymyn damytýdyń orasan zor shyǵyndaryna qatysty alańdaýshylyǵyna baılanysty boldy.
Osy arada Apple aktsııalary beısenbide jarııalanatyn toqsandyq tabys týraly esebi aıasynda kompanııany kapıtaldandyrýyn 1%-ǵa arttyryp, 4,95 trln dollarǵa jetkizdi. Kompanııa jasandy ıntellekt tehnologııalaryna suranystyń artýyna baılanysty jad chıpteriniń jahandyq tapshylyǵynyń áserin alǵash ret jarııalaıdy dep kútilip otyr. Osy tapshylyqqa baılanysty Apple maýsym aıynda Mac jáne iPad baǵalaryn kóterdi.
Nvidia 2025 jyldyń maýsymynan beri álemdegi eń qundy kompanııa ataǵyn ıelenip keledi, sol kezde ol Microsoft-ty basyp ozdy. Sol jyldyń qazan aıynda Nvidia naryqtyq kapıtalızatsııasy 5 trln dollarǵa jetken álemdegi alǵashqy kompanııa boldy.
2026 jyldyń basynan beri Nvidia aktsııalary tek 4%-ǵa, al Apple aktsııalary 24%-ǵa ósti. Investorlar Apple ósimin qoldap, kompanııanyń jasandy ıntellekt shyǵyndaryna degen saqtyǵyna oń kózqaras tanytty. Apple óz ınfraqurylymyn keń kólemde qurýdyń ornyna esepteý qýatyn jalǵa alýdy jón kóredi.
Osyǵan deıin Apple kompanııasy Broadcom-pen jasalǵan chıp jetkizý týraly kelisim aıasynda 30 mlrd dollardan astam qarjy jumsaýdy josparlap otyrǵanyn jazdyq.
