Apple iPhone óndirisin Qytaıdan Úndistanǵa kóshirýi múmkin

ASTANA. KAZINFORM –  Apple kelesi jyly AQSh-ta satylatyn iPhone qurylǵylarynyń jınaǵyn Qytaıdan Úndistanǵa kóshirýdi josparlap otyr, dep habarlaıdy NDTV. 

Apple Qytaıdan bas tartyp, iPhone óndirisin Úndistanǵa kóshirýdi jyldamdatýy múmkin. Bul sheshim, NDTV málimetinshe, Úndistannyń jabdyqtaý tizbegin qanshalyqty tez damyta alatynyna jáne Qytaı men AQSh arasyndaǵy saýda kelissózderiniń barysyna baılanysty bolady.

AQSh prezıdenti Donald Tramp Apple-ge Qytaımen baılanysty azaıtý úshin qysym kórsetip otyr. Ol jaqynda Qytaımen tarıfterge qatysty kelissózder jalǵasyp jatqanyn rastady. Bul arada Úndistandaǵy Apple-diń seriktes óndirýshileri óndiris kólemin arttyra bastady.

Foxconn kompanııasynyń Karnataka shtatynyń Bangalor qalasyndaǵy zaýyty osy aıda iske qosylady dep kútilip otyr jáne ol tolyq qýatynda jylyna 20 mıllıon qurylǵyǵa deıin óndire alady. Sonymen qatar Foxconn-nyń taǵy bir iri zaýyty Tamılnad shtatynda ornalasqan, ol Apple ónimderiniń halyqaralyq jetkiziliminiń shamamen 50%-yn qamtamasyz etedi.

Kompanııanyń eksporty ótken qarjy jylymen salystyrǵanda 40%-dan astamǵa ósti. Buǵan qosa, Úndistanda iPhone óndirisi rekordtyq deńgeıge jetti: sońǵy bir jyl ishinde 22 mıllıard dollarǵa baǵalanatyn qurylǵylar shyǵarylǵan.

Qazirgi ýaqytta Úndistan Apple-diń jahandyq iPhone óndirisiniń shamamen 20%-yn qurap otyr, bul eldiń mobıldi tehnologııa salasyndaǵy mańyzdy rólin aıǵaqtaıdy. Sarapshylar bıyl Apple Úndistandaǵy jyldyq ósimin 10–15% deńgeıinde saqtaıdy dep boljap otyr.

Buǵan deıin Tramp engizgen tarıfterge baılanysty Apple iPhone baǵasyn kóterýi múmkin ekeni habarlanǵan bolatyn.

Aıta ketelik Eýroodaq Apple men Meta kompanııalaryna aıyppul saldy.