Apple «iPhone 8» jáne «iPhone X» jańa smartfondaryn tanystyrdy
ASTANA. QazAqparat - Apple kompanııasy Kalıfornııada iPhone 8, iPhone 8 Plus jáne iPhone X jańa smartfondaryn tanystyrdy. Korporatsııa óziniń saıtynda tanystyrylym sharasynan onlaın-translıatsııa júrgizdi, dep habarlaıdy QazAqparat tilshisi.
Sý ótkizbeıtin iPhone X («aıfon ten» dep atalady) telefonynyń korpýsy shynydan jasalǵan. iPhone-dy qosý úshin ekrannyń astyńǵy jaǵyn saýsaqpen júrgizý qajet. Al buǵattaýdan shyǵarý úshin Face ID fýnktsııasy qoldanylady, ıaǵnı telefon paıdalanýshynyń kelbetin tanıdy. Smartfonǵa ornatylǵan neıroprotsessor óz ıesiniń kelbetin qarańǵy jerde de tanýǵa múmkindik beredi. Telefondy adamnyń fotosy arqyly buǵattaýdan shyǵarý múmkin emes. Face ID fýnktsııasy onyń jansyz beıne ekenin birden anyqtaıdy.
iPhone X-tiń satylymy bıylǵy jyldyń 3 qarashasynda bastalady. Onyń baǵasy este saqtaý jadyna baılanysty 470 - 550 myń teńge aralyǵynda bolady.
Al iPhone 8 jáne 8 Plus smartfondaryna A11 Bionic alty ıadroly protsessor ornatylǵan. Sonyń arqasynda apparattyń qyzmet jyldamdyǵy artty. Sondaı-aq Retina HD dıspleıi, jańa stereokolonkalary, 12 megapıkseldi kameralary bar. Apple kompanııasynyń ókilderi málim etkendeı, iPhone 8-ge naryqtaǵy eń myqty shyny ornatylǵan, onyń ústine, sý jáne shań ótkizbeý qabileti saqtalǵan. Qurylǵylardy symsyz, tokqa qospaı qýattandyrýǵa bolady.
Baılanys quraly 22 qyrkúıekten bastap saýdaǵa shyǵarylady. iPhone 8-diń baǵasy 335 myń teńgeden, iPhone 8 Plust-tiń baǵasy 380 myń teńgeden bastalady.
