Apple golografııalyq ekrany bar iPhone ázirleýi múmkin
ASTANA. KAZINFORM — Apple korporatsııasy golografııalyq dıspleıi bar iPhone modelin ázirleýmen aınalysýy múmkin. Bul qurylǵy jetkizý tizbeginde Spatial iPhone ataýymen atalyp júr, dep habarlaıdy MacRumors ınsaıder Schrödinger-ge silteme jasap.
Insaıderdiń málimetinshe, jobaǵa qatysy bar derekkózder bul jobamen tanys. Mundaı qurylǵy úshin MH1 nemese H1 kodtyq ataýlarymen jańa dıspleı ázirlenip jatyr.
Ekran kóz qozǵalysyn qadaǵalaý tehnologııasyn jaryqty dıfraktsııalyq basqarý júıesimen biriktirýi tıis. Bul keskindi qajetti buryshqa baǵyttap, arnaıy kózildiriksiz-aq kólemdi beıne áserin jasaýǵa múmkindik beredi.
Derekkózdiń aıtýynsha, AMOLED paneline engiziletin golografııalyq qabat nanoqurylymǵa negizdeledi, sonyń arqasynda obektiler ekran betiniń ústinde «qalyqtap turǵandaı» kórinedi. Sondaı-aq smartfondy eńkeıtken kezde kórý buryshyn ózgertip, nysandardy ár qyrynan qaraýǵa múmkindik beretin arnaıy algorıtm qarastyrylǵan.
Apple dıspleıi standartty eki ólshemdi rejımde tolyq 4K ajyratymdylyqty saqtaıdy, al golografııalyq qabat tek belgili kontentte iske qosylady. Bul tehnologııa Zero Clarity Loss dep atalady, sebebi ol burynǵy 3D-dıspleılerde kezdesetin sapa joǵalý máselesin joıady dep boljanýda.
Schrödinger jobanyń ázirge bastapqy zertteý kezeńinde ekenin jáne golografııalyq smartfondardyń jappaı shyǵýy 2030 jyldan erte bolmaıtynyn atap ótti. Sondaı-aq mundaı tehnologııaǵa tek Samsung ǵana emes, basqa da kompanııalar qyzyǵýshylyq tanytyp otyrǵany jáne Spatial iPhone týraly qaýesetter komponent jetkizýshiler arasynda talqylanyp jatqany aıtylǵan.
Buǵan deıin Apple korporatsııasy iPhone smartfondaryn keminde aldaǵy 50 jyl boıy óndiretinin jazdyq.
