Apple basshysy Trampqa altyn tuǵyrdaǵy áınek kádesyıyn tartý etti

ASTANA. KAZINFORM — Apple kompanııasynyń bas dırektory Tım Kýk Donald Trampqa 24 karattyq altynnan jasalǵan tuǵyry bar, aty jazylǵan erekshe áınek kádesyıyn syıǵa tartty, dep jazdy Business Insider.

Kádesyı — dóńgelek pishindi áınek dısk, onyń betinde Tramptyń esimi, Apple logotıpi jáne Tım Kýktyń qoltańbasy qashalyp jazylǵan.

— Bul — Corning kompanııasynyń konveıerinen shyqqan áınek. Gravıýra arnaıy prezıdent Tramp úshin jasaldy, — dedi Kýk Aq úıdegi rásim kezinde jýrnalısterge. — «Bul biregeı dúnıe, jalǵyz dana».

Tım Kýktyń aıtýynsha, áınek Kentýkkı shtatynda, al tuǵyr ıÝta shtatynda jasalǵan. Ol sonymen qatar Apple kompanııasy jaqyn arada iPhone jáne Apple Watch qurylǵylaryna arnalǵan barlyq áınekti Kentýkkıdegi jańa zaýytta óndiretinin aıtty. Bul zaýyt smartfondarǵa arnalǵan áınek óndiretin eń iri jáne ozyq jelige aınalmaq.

Sondaı-aq, mıllıarder «American Manufacturing Program (AMP)» dep atalatyn jańa baǵdarlamany iske qosatynyn málimdedi jáne AQSh-taǵy óndiris sektoryna ınvestıtsııa kólemin 600 mlrd dollarǵa deıin arttyrdy. Bul buǵan deıin ýáde etilgen somadan 100 mlrd dollarǵa kóp. Tım Kýktyń aıtýynsha, osy ınvestıtsııalar aıasynda jaqyn bolashaqta iPhone men Apple Watch úshin barlyq qorǵanysh áınekter 100% AQSh-ta óndiriledi.

Óz kezeginde AQSh prezıdenti Donald Tramp, el ishinde óndiris ashqan nemese ashýdy josparlaǵan kompanııalar 100% ımporttyq tarıfterden bosatylatynyn aıtty:

— Apple sııaqty AQSh-ta damyp jatqan kompanııalar úshin jaqsy jańalyq: eger siz óndiristi AQSh-ta qursańyz nemese soǵan mindetteme alsańyz — eshqandaı kedendik tólem bolmaıdy, — dedi Tramp.

Aıta keteıik, bul syılyq týraly jańalyq saıası jáne iskerlik ortada keń talqylaý týdyrdy.

Buǵan deıin Donald Tramp jartylaı ótkizgishterge 100% kedendik baj salyǵy engizetinin jarııalaǵan bolatyn.