Apple alǵash ret sensorlyq MacBook Pro-ny tanystyrdy
ASTANA. KAZINFORM — Apple Mac tarıhynda alǵash ret sensorlyq ekrany bar MacBook Pro noýtbýgin tanystyrdy. Jańa modelde jaryqtanatyn logotıp pen iPhone-ǵa tanys Dynamic Island fýnktsııasy da bar, dep habarlaıdy Kazinform.
— MacBook Pro alǵash ret Mac qurylǵylaryna ıntýıtıvti sensorlyq basqarý múmkindigin engizip, kásibı mamandardyń kontentpen jumys isteý tásilin jańa deńgeıge kóteredi, — dep málimdedi kompanııa.
Noýtbýk ekran dıagonali 14 jáne 16 dıýım bolatyn eki nusqada usynylady. 14 dıýımdik modeldiń bastapqy baǵasy — 2 899 dollar (shamamen 1,33 mln teńge), al 16 dıýımdiki — 3 399 dollar (shamamen 1,55 mln teńge).
Dynamic Island habarlandyrýlardy, belsendi áreketter men basqarý elementterin kórsetip, júıe fýnktsııalaryna jyldam qol jetkizýge múmkindik beredi. Sondaı-aq birneshe jyldan beri qoldanylmaǵan jaryqtanatyn Apple logotıpi noýtbýktiń syrtqy betinde qaıta paıda boldy.
Jańa MacBook Pro noýtbýkteri Apple kompanııasynyń kásibı qurylǵylarǵa arnalǵan eń qýatty protsessorlary sanalatyn M5 Pro jáne M5 Max chıpterimen jabdyqtalǵan. Ekran ólshemi men konfıgýratsııasyna qaraı noýtbýkterdiń salmaǵy 1,4-1,8 keli aralyǵynda bolady.
MacBook Pro qýattaýsyz 24 saǵatqa deıin jumys isteıdi. M5 Pro chıpi bar modeldiń jedel jady 24-64 GB bolsa, M5 Max nusqasynda 128 GB-qa deıin jetedi. Al derekterdi saqtaýǵa arnalǵan jınaqtaýyshtyń syıymdylyǵy 16 TB-qa deıin ulǵaıtylǵan.
Jańa noýtbýkterge aldyn ala tapsyrys qabyldaý bastaldy. Alǵashqy jetkizilim 6 qarashaǵa josparlanǵan.
Buǵan deıin Apple alǵashqy búktelmeli iPhone-yn tanystyrǵanyn habarlaǵan bolatynbyz.
