Apple — álemdegi eń qymbat brend atandy

ASTANA. KAZINFORM — Brendterdi baǵalaýmen aınalysatyn halyqaralyq Brand Finance uıymy «Global 500 — 2026 jylǵy álemdegi eń qymbat 500 brend» atty esebin jarııalady, dep jazdy Anadoly agenttigi.

Reıtıngide AQSh kósh bastady: Global 500 tizimindegi 192 kompanııa — amerıkalyq, 68-i — qytaılyq, 33-i — japondyq, 33-i — frantsýzdyq, 26-sy — germanııalyq jáne 25-i — brıtandyq.

Agenttiginiń tilshisi zertteý nátıjelerine súıene otyryp jınaqtaǵan derekterge sáıkes, Apple 607,6 mlrd AQSh dollarymen ótken jylǵydaı álemdegi eń qymbat brend dep tanyldy. 2025 jyly kompanııanyń brendtik quny 574,5 mlrd dollar bolǵan.

Apple-den keıin Microsoft (565,3 mlrd dollar) jáne Google (433,1 mlrd dollar) ornalasty. 2025 jyly Microsoft brendi shamamen 461,1 mlrd dollarǵa, al Google 413 mlrd dollarǵa baǵalanǵan edi.

Tizimde amerıkalyq Amazon 369,9 mlrd dollarmen 4-orynǵa, amerıkalyq Nvidia 184,3 mlrd dollarmen 5-orynǵa jaıǵasty. Qytaılyq TikTok 153,5 mlrd dollarmen 6-orynǵa, amerıkalyq bólshek saýda alyby Walmart 141 mlrd dollarmen 7-orynǵa shyqty. Ońtústik Koreıanyń Samsung kompanııasy 119,2 mlrd dollarmen 8-oryndy ıelense, amerıkalyq Facebook 107 mlrd dollarmen 9-orynda, qytaılyq State Grid 102,4 mlrd dollarmen 10-orynda tur.

Zertteý nátıjesine sáıkes, elder reıtıngisinde AQSh birinshi orynda. Global 500 tizimine engen 192 brend — amerıkalyq, 68-i — qytaılyq, 33-i — japondyq, 33-i — frantsýzdyq, 26-sy — germanııalyq jáne 25-i — brıtandyq kompanııalar.

Álemdegi eń qymbat 500 brendtiń jalpy quny 10%-ǵa artty

Brand Finance Türkiye dırektory Muhterem Ilgıýner «Anadolý» agenttiginiń tilshisine bergen suhbatynda álemdegi eń qymbat brendterge qatysty pikir bildirdi.

Birikken Ulttar Uıymynyń derekterine sáıkes, jahandyq ekonomıkalyq ósim tómen deńgeıde qalyp otyrǵanyn atap ótken Ilgıýner:

— Brand Finance málimetteri jaǵdaıdyń ózgeshe ekenin kórsetedi. Álemdegi eń qymbat 500 brendtiń jalpy quny ótken jylmen salystyrǵanda 10%-ǵa ósip, 10,4 trln dollarǵa jetti, — dedi.

Onyń aıtýynsha, bul kórsetkish jahandyq ekonomıkalyq ósimnen 3,2%-ǵa joǵary. AQSh 192 brendpen jáne 5,5 trln dollarlyq qunymen naryqtyń 53,4%-yn ıelenip otyr. Qytaı — 1,6 trln dollarmen 15%, Germanııa — 580,2 mlrd dollarmen 5,6%, Japonııa — 490 mlrd dollarmen 4,7%, Frantsııa — 426,5 mlrd dollarmen 4% úleske ıe. Al eń tómen úles Argentınaǵa tıesili — bir brend jáne 6 mlrd dollar.

Ilgıýner salalar boıynsha eń úlken úles bank sektoryna tıesili ekenin aıtty: 79 brendtiń jalpy quny 1,3 trln dollardy qurap, 12,5% úlespen birinshi orynda tur. Bankterden keıin 25 medıa-brend (1,1 trln dollar), 17 elektrondy brend (835,4 mlrd dollar), 11 ınternet jáne baǵdarlamalyq qamtamasyz etý brendi (759,4 mlrd dollar), sondaı-aq 40 bólshek saýda brendi (707 mlrd dollar) ornalasqan.

Revolut brendi 239%-ǵa ósim kórsetti

Ilgıýnerdiń aıtýynsha, brendtik quny eń tómen sala — taý-ken óndirý jáne metallýrgııa, onyń jalpy quny 5,5 mlrd dollardy quraıdy.

— Ótken jylmen salystyrǵanda eń joǵary ósim — 239% — brıtandyq fınteh-kompanııa Revolut brendine tıesili. Al eń úlken tómendeý — 35,8% — Tesla brendinde tirkeldi, — dedi ol.

Sondaı-aq tizimniń sońynda turǵan brendtiń quny 5,2 mlrd dollar ekenin atap ótken Ilgıýner:

— Túrkııalyq brendterdiń eshqaısysy bul deńgeıge jete almaǵandyqtan, olar bıyl da reıtıngke enbedi. Sońǵy 10 jylda Túrkııadaǵy eń qymbat brend pen jahandyq tizimniń sońyndaǵy brend arasyndaǵy aıyrmashylyq barǵan saıyn ulǵaıyp keledi. Basqasha aıtqanda, elder óz brendteri arqyly baıyp otyr. Sondyqtan Túrkııa úshin de brend qalyptastyrýǵa basymdyq berý asa mańyzdy, — dep túıindedi.

Aıta keteıik, buǵan deıin Apple 84 eldegi paıdalanýshylarǵa kıberqaýip týraly habarlamalar jibergen bolatyn.