Apple, AirPods, Puma: Jambylda 500-den astam jalǵan taýar tárkilendi
ASTANA. KAZINFORM — Jambyl oblysynda taýar belgilerin zańsyz paıdalanýǵa qatysty tekserýler ákimshilik isterdiń qozǵalýyna jáne jalpy somasy 1,5 mln teńgeden asatyn aıyppul salýǵa ákeldi. Bul týraly Kazinform agenttiginiń tilshisi habarlady.
2026 jyldyń toǵyz aıynda óńirde zańsyz aınalymnan 504 kontrafakt ónim tárkilendi. Taýarlardyń jalpy quny shamamen 2 mln teńgege baǵalandy.
Oblystyq Ádilet departamentiniń málimetinshe, zańbuzýshylyqtar Apple, iPhone, AirPods, Splat, Hugo Boss jáne Puma taýar belgilerin paıdalanýǵa qatysty bolǵan. Jospardan tys tekserýlerge taýar belgileriniń quqyq ıeleriniń ókilderi bergen ótinishter negiz bolǵan.
Jalpy 16 tekserý júrgizildi. Onyń qorytyndysy boıynsha 16 adam ákimshilik jaýapkershilikke tartyldy. Sot barlyq isti qarap, jalpy somasy 1 531 050 teńge aıyppul salý týraly sheshim shyǵardy.
Byltyrǵy jyldyń sáıkes kezeńimen salystyrǵanda tárkilengen ónim sany edáýir artqan. 2025 jyldyń toǵyz aıynda zańsyz aınalymnan 403 taýar alynǵan. Olardyń quny shamamen 1,56 mln teńge bolǵan.
Buǵan deıin Shymkentte tanymal brendterdiń ataýymen qurylys qospalaryn zańsyz óndiretin jasyryn tseh anyqtalǵan edi. Tekserý kezinde 860-tan astam qap ónim tárkilendi.
Sondaı-aq Shymkentte «Toyota» jáne «Lexus» taýar belgileri bar kontrafaktilik motor maıyn zańsyz satýdyń joly kesilgenin jazǵan bolatynbyz.
