Apple 4 naýryzda qandaı jańalyqtar usynady
ASTANA. KAZINFORM – Apple kompanııasy 2026 jylǵy alǵashqy iri tehnıka tanystyrylymyn jarııalady. Іs-shara 4 naýryzda ótedi jáne aldyn ala málimetterge sáıkes, jyl basyndaǵy eń aýqymdy premeralardyń birine aınalýy múmkin, dep habarlaıdy Kazinform.
Special Apple Experience dep atalatyn prezentatsııa bir mezgilde úsh qalada – Nıý-Iork, Shanhaı jáne Londonda ótedi. Jýrnalısterge jiberilgen shaqyrtýlarda sary, jasyl jáne kók tústi dıskilerden quralǵan úshólshemdi Apple logotıpi beınelengen.
Basty mobıldi jańalyq retinde iPhone 17e modeli atalyp otyr. Bul jańa býyndaǵy eń qoljetimdi nusqa bolýy múmkin. Insaıderlik málimetterge sáıkes, qurylǵy:
– 6,1 dıýımdik dıspleımen jáne juqartylǵan alıýmınıı jıektermen;
– buǵan deıin tek joǵary sanattaǵy modelderde bolǵan Dynamic Island oıyǵymen;
– standartty iPhone 17-de alǵash ret tanystyrylǵan A19 protsessorymen;
– qýaty 15 Vt-qa deıingi MagSafe magnıttik qýattaý qoldaýymen jabdyqtalady.
Negizgi kamera 48 megapıksel ruqsattylyǵyn jáne eki eselik optıkalyq zýmdy saqtaıdy. Al aldyńǵy kamera 18 megapıkseldi jańa sensor men Center Stage fýnktsııasyna ıe bolady dep kútilýde. Bastapqy baǵasy 599 AQSh dollarynan bastalýy múmkin. Resmı tanystyrylym dál 4 naýryzda ótedi.
Planshetter qatarynda bazalyq iPad pen iPad Air nusqalary jańartylady dep kútilýde. Bazalyq iPad A16 ornyna A18 chıpine kóship, alǵash ret Apple Intelligence platformasynyń fýnktsııalaryn usynady. Al iPad Air M3 protsessorynan anaǵurlym qýatty M4-ke aýysýy yqtımal.
Kompıýterlik baǵytta M5 Pro jáne M5 Max protsessorlarymen jabdyqtalǵan jańartylǵan MacBook Pro modelderi tanystyrylady. Sonymen qatar kompanııa tarıhyndaǵy baǵasy 1000 dollardan tómen alǵashqy qoljetimdi MacBook-tyń debıýti basty oqıǵaǵa aınalýy múmýin. Aldyn ala málimetter boıynsha, onyń baǵasy shamamen 700 dollardan bastalady.
Qunyn tómendetý úshin kompanııa birqatar ymyraǵa barýdy kózdep otyr. Atap aıtqanda, M-serııasynyń ornyna A18 mobıldi chıpi qoldanylyp, dıspleı dıagonali 13 dıýımnen kishi bolady jáne qurylǵy arhıtektýrasy jeńildetiledi. Soǵan qaramastan noýtbýk alıýmınıı korpýsyn saqtaıdy. Ol úshin óndiristiń jańa, únemdi ádisi ázirlengen. Model stýdentter men korporatıvtik klıentterge baǵyttalyp, ashyq, biraq ustamdy tústerde usynylady.
Budan bólek, Mac kompıýterlerine arnalǵan jańa syrtqy dıspleıler, jańartylǵan Apple TV prıstavkasy jáne HomePod mini aqyldy kolonkasy tanystyrylady. Sarapshylar kóktemgi prezentatsııany sońǵy ýaqyttaǵy eń eleýli tehnologııalyq oqıǵalardyń biri retinde baǵalap otyr.
Aıta keteıik, Apple satylymy 16%-ǵa óskeni habarlanǵan edi.