Appelıatsııalyq satyda Ermegııaevke qatysty sot sheshimi ózgerissiz qaldyryldy
ASTANA. QazAqparat - Astanada Talǵat Ermegııaevtiń jáne «Astana EKSPO-2017» Ulttyq kompanııasynyń ózge de fıgýranttarynyń isi boıynsha appelıatsııalyq sot alqasynyń sheshimi shyqty.
«Astana qalasynyń Qylmystyq ister boıynsha appelıatsııalyq sot alqasy Talǵat Ermegııaevke qatysty 9 maýsymdaǵy Astana qalasynyń qylmystyq ister jónindegi aýdanaralyq mamandandyrylǵan sotynyń úkimin ózgerissiz qaldyrýdy úkim etti», - dedi Astana qalasynyń Qylmystyq ister boıynsha appelıatsııalyq sot alqasynyń tóraǵasy Asqarjan Kenjeǵarın.
Aıta keteıik, «Astana EKSPO-2017» Ulttyq kompanııasynyń burynǵy basshysy Talǵat Ermegııaev 9 maýsymda Astana qalasynyń qylmystyq ister jónindegi aýdanaralyq mamandandyrylǵan sotynyń úkimimen 14 jylǵa bas bostandyǵynan aıyrylǵan bolatyn.
Sonymen qatar oǵan materıaldyq jaýapkershiligi joǵary memlekettik laýazymdy ıelenýge ómir boıyna tyıym salyndy jáne «Parasat» ordeni qaıtaryp alynǵan edi.
Sondaı-aq Talǵat Ermegııaevtiń jeke múlikteri de tárkilendi. «Astana EKSPO-2017» Ulttyq kompanııasynyń paıdasyna 5 mıllıard 901 mıllıon teńge 445 myń 90 teńge qarjy alý týraly sheshim shyǵarylǵan.
Memleket paıdasyna Ermegııaevtiń ıeligindegi Almatydaǵy páteri, ÝAZ avtokóligi, Almaty oblysyndaǵy eki jer telimi, Astanadaǵy páteri, Astana qalasy Telman poselkesindegi jer ýchaskeleri tárkilendi. Ermegııaevtiń jeke múlki memleket paıdasyna: «Sambek» JShS-daǵy Ermegııaevtiń 30% úlesi, TKM - 30%, «Globýs Almaty» - 50%, «Hozý-trans» JShS - 100%, «Rahat-avto» JShS - 18%, «Globýs Astana» - 50%, Halyq bankindegi 680 113 teńge, ATF-Bank 5 600 dollar men 39 739 eýro, 13 myń eýro jeke qarajattary, 2010 jáne 2014 jyly shyǵarylǵan «Leksýs-570» markaly eki kóligi, sondaı-aq 2009 jáne 2014 jylǵy «Mersedes» eki kóligi de memleket paıdasyna alynady.
Esterińizge sala keteıik, «Astana EKSPO-2017» Ulttyq kompanııasynyń burynǵy basshysyna QR QK-niń 176-babynyń 4-bóligindegi «b» tarmaqshasymen qarastyrylǵan aýyr qylmystardy birneshe ret qasaqana jasady degen aıyp taǵylǵan. Aıyptaýshynyń aqparaty boıynsha, jymqyrylǵan qarajat kólemi 10,2 mıllıard teńgeni qurap otyr. Onymen birge 22 adam sot aldynda jaýap berdi. Olardyń negizgi bóligi kompanııa qyzmetkerleri bolǵan. Qylmystyq is 540 tomǵa jetti.
