Appelıatsııa soty Eljan Birtanovtyń isi boıynsha sheshim shyǵardy

NUR-SULTAN. QazAqparat – Nur-Cultan qalasynyń apellıatsııalyq soty Bas prokýratýranyń burynǵy densaýlyq saqtaý mınıstri Eljan Birtanovtyń isin prokýratýraǵa keri qaıtarý týraly shaǵymy boıynsha sheshim shyǵardy, dep habarlaıdy QazAqparat tilshisi.

Eljan Birtanovtyń isin prokýratýraǵa keri qaıtarý týraly sot sheshimi ózgerissiz qalatyn boldy.

«Sot alqasy qaýly etedi. Nur-Sultan qalasy Saryarqa aýdanynyń №2 aýdandyq sotynyń 28 qańtardaǵy Eljan Birtanov pen Oljas Ábishevke qatysty isti boıynsha prokýratýraǵa keri qaıtarý týraly qaýlysy Qylmystyq-protsessýaldyq kodekstiń 329-babyndaǵy tártipke sáıkes ózgerissiz qalsyn», - dedi sýdıa.

Eske salsaq, sot otyrysy keshe, 17 qańtarda bastalǵan bolatyn.

Prokýror Jangeldi Esebaevtyń sózinshe, isti keri qaıtarý týraly sheshim Qazaqstan Joǵarǵy sotynyń normatıvtik qaýlylaryna qaıshy bolǵan.

Al qorǵaýshy tarap búkil tergeýdiń barysynda aıtarlyqtaı zańbuzýshylyqtar bolǵanyn málim etti.

Onyń ishinde saraptaý óndirisinde, qarjy jymqyrý babyn qyzmetin asyra paıdalaný babyna aýystyrý kezinde, sotqa deıingi tergeýdiń tizbesine tirkeý kezinde, qylmystyq is materıaldarymen tanystyrý kezeńinde, Eljan Birtanovtyń burynǵy kómekshisi Oljas Ábishevke qatysty da aıyptaý aktisin tanystyrǵan kezde jáne isti sotqa ótkizý kezinde zań buzylǵan.