«Aport» sortyn qaıta jańǵyrtý jobasyn iske asyrý máseleleri talqylandy
ASTANA. KAZINFORM — Aýyl sharýashylyǵy mınıstri Aıdarbek Saparov Qazaq jemis-kókónis sharýashylyǵy ǵylymı-zertteý ınstıtýtynyń «Talǵar» aımaqtyq fılıalynda bolyp, «Aport» sortyn qaıta jańǵyrtý jobasyn iske asyrý máseleleri boıynsha kóshpeli keńes ótkizdi. Bul týraly QR Aýyl sharýashylyǵy mınıstrliginiń baspasóz qyzmeti habarlady.
Jıynda «2025–2028 jyldarǵa arnalǵan «Aport» almasynyń sortyn qaıta jańǵyrtý» Jol kartasyn júzege asyrý boıynsha esepter tyńdaldy. Osy baǵyttaǵy ózekti máseleler talqylanyp, ony sheshýdiń joldary naqtylandy.
Ótken jyly Jońǵar Alataýy ulttyq parkinde Sıvers jabaıy almasynyń 60 myń tuqymy jınalyp, sebildi. Oǵan qosa, 0,7 gektar aýmaqqa kóshetjaı egildi.
— Bıyl aqpan aıynda sapaly kóshetter daıyndaý úshin 0,5 gektar alqapta qysqy egý júrgizildi. Búgingi kúni «Aport» sortynan 2100 túp kóshet ósirildi. Al kúzde 10 gektar aport baǵy otyrǵyzylyp, 2027 jylǵa qaraı mundaı alqaptardyń jalpy kólemi 110 gektarǵa jetkizilmek, — dep jazdy mınıstrliktiń baspasóz qyzmeti.
Qyrkúıek aıynda ınstıtýttyń «Talǵar» aımaqtyq fılıaly bazasynda «Baq kúni» uıymdastyrylyp, onda ınstıtýttyń selektsıoner-ǵalymdarynyń ǵylymı jetistikteri men damý basymdyqtary tanystyryldy.
Eske sala keteıik, bul baǵyttaǵy júıeli jumys Memleket basshysynyń tapsyrmasymen byltyrǵy jyly bastalyp, Qazaqstan sımvoldarynyń biri ári qundy mádenı murasy — «Aport» almasynyń sortyn qalpyna keltirýge baǵyttalǵan.
Prezıdent Іs basqarmasynyń «Astana 20» memlekettik qorynyń belsendi qoldaýymen sapaly kóshet qoryn ósirý jumystary júrgizilip keledi. Bul bolashaq baqty qalyptastyrýdyń negizi bolmaq.
Aýyl sharýashylyǵy mınıstrligi aldaǵy ýaqytta da Jol kartasy aıasynda is-sharalardy jan-jaqty úılestirip, sabaqtastyqty jalǵastyrady. Sondaı-aq ǵylymı negizdi jáne aportty qaıta jańǵyrtý jobasynyń turaqty damýyn qamtamasyz etýge basa kóńil bóletin bolady.
Aıta keteıik, Almaty aporty resmı túrde Qazaqstannyń ulttyq brendi atandy.
Sondaı-aq elde almanyń bul sorty qaıta ósirile bastady.