«Aportty» qalpyna keltirý úshin 110 gektar jer baqqa aınalady
ASTANA. KAZINFORM - Aýyl sharýashylyǵy mınıstri Aıdarbek Saparovtyń tapsyrmasyna sáıkes, 2025–2028 jyldarǵa arnalǵan «Aport» almasynyń sortyn qaıta jańǵyrtý jónindegi Jol kartasynyń júzege asyrylýyna monıtorıng júrgizildi.
Aýyl sharýashylyǵy mınıstrligi málimetinshe, bul baǵyttaǵy júıeli jumys Memleket basshysynyń tapsyrmasyna sáıkes 2024 jyly bastaldy jáne elimizdiń biregeı mádenı murasy ári sımvoly sanalatyn «Aport» almasynyń sortyn qalpyna keltirýge baǵyttalǵan.
Prezıdent Іs Basqarmasyna qarasty «Astana 20» memlekettik qorynyń belsendi qoldaýymen sapaly kóshet materıalyn ósirý jumystary júrgizilip jatyr. Bul materıal bolashaqta «Aport» sortyn otyrǵyzatyn jańa baqtardyń negizine aınalmaq.
2024 jyly Jońǵar Alataýynyń taýly aımaqtarynan Sıvers jabaıy almasynyń tuqymdary jınalyp, olar sebilip, kóshet pıtomnıgi quryldy. 2025 jylǵy aqpanda sapaly kóshetter daıyndaý maqsatynda 10 gektar alqapta qysqy kóztańba (okýlırovka) jumystary júrgizildi.
Mınıstrlik ókilderiniń Almaty oblysyna jumys sapary Aýyl sharýashylyǵy vıtse-mınıstri Azat Sultanovtyń tóraǵalyǵymen ótken keńespen aıaqtaldy. Keńeske salalyq qurylymdar men ǵylymı qaýymdastyq ókilderi qatysty. Onda Qazaq jemis-kókónis sharýashylyǵy ǵylymı-zertteý ınstıtýtynyń «Talǵar» óńirlik fılıaly basshysynyń esebi tyńdaldy. Sonymen qatar jobany iske asyrýǵa kedergi keltirip otyrǵan máseleler talqylanyp, olardy sheshýdiń naqty joldary aıqyndaldy. Tıisti qurylymdarǵa naqty tapsyrmalar berildi.
Aıta keteıik, 2027 jyldyń sońyna deıin 110 gektar baq otyrǵyzý kózdelip otyr.
Sonymen qatar «Aport» almasyn ulttyq brend retinde keńinen nasıhattaý jumystary júrgizilip jatyr. Atap aıtqanda, bıylǵy qyrkúıek aıynda Qazaq jemis-kókónis sharýashylyǵy ǵylymı-zertteý ınstıtýtynyń pomologııalyq baǵy bazasynda «Baq kúni» is-sharasy ótedi.
Aýyl sharýashylyǵy mınıstrligi Jol kartasyn iske asyrý sheńberinde barlyq is-sharalardy úılestirip, jobanyń ǵylymı negizin, sabaqtastyǵyn jáne ornyqty damýyn qamtamasyz etýdi jalǵastyrady.
Aıta keteıik, Almaty aporty resmı túrde Qazaqstannyń ulttyq brendi atandy.