Ápkesiniń 2 jasar balasyn terezeden laqtyrǵan azamat jazaǵa tartylmaıtyn boldy

ShYMKENT. KAZINFORM. Shymkentte týǵan ápkesiniń 2 jasar balasyn 3-qabattaǵy páterdiń terezesinen laqtyryp jibergen er adam qylmystyq jaýapkershilikten bosatyldy. Sebebi ol psıhıkalyq aýrýmen aýyratyny belgili boldy. 

Shymkent qalasynyń qylmystyq ister jónindegi mamandandyrylǵan aýdanaralyq sotynyń málimetinshe, er azamatqa Qylmystyq kodekstiń 99-baby 1-bóligimen (Adam óltirý) aıyp taǵylǵan. Іs ashyq sot otyrysynda qaraldy. 

Anyqtalǵandaı, 2023 jyldyń 23 qarashasy kúni saǵat 20:00 shamasynda psıhıkalyq aýrýmen aýyratyn er adam týǵan ápkesiniń páterinde bolǵan. 2 jasar balanyń toqtamaı jylaǵany júıkesine tıgen. Sodan búldirshindi 3-qabattaǵy as bólmeniń terezesinen laqtyryp jibergen. Atalǵan jaǵdaıdan soń bala kóz jumǵan. 

Jábirlenýshiniń, kýálerdiń jaýaptarymen, zattaı dáleldemelermen jáne sot saraptamalarynyń tujyrymdarymen onyń kinási dáleldendi. Sot er adam qoǵamdyq qaýipti áreketti jasaǵan kezde esi durys emes kúıde bolǵanyna baılanysty ony qylmystyq jaýapkershilikten bosatyp, oǵan mamandandyrylǵan úlgidegi psıhıatrııalyq statsıonarda májbúrlep emdeý sharasyn qoldandy. Qylmystyq is toqtatyldy. Qaýly zańdy kúshine endi. 

Eske salsaq, biz buǵan deıin Shymkentte óz balasyn pyshaqtap óltirgen ákege qatysty qylmystyq is toqtatylyp, er adam psıhıatrııalyq statsıonarda májbúrli túrde emdeletini týraly jazdyq.