Apellıatsııalyq sot Arystanbek Muhamedıulyna qatysty úkimdi qaıta qarady
ASTANA. KAZINFORM – 2024 jylǵy 21 tamyzda Astana qalalyq sotynyń qylmystyq ister jónindegi sot alqasy burynǵy mınıstr Arystanbek Muhamedıuly jáne basqalaryna qatysty qylmystyq isti apellıatsııalyq tártipte qarady. Bul týraly Astana qalalyq soty habarlaıdy.
Eske sala keteıik, bıyl aqpanda eks-sheneýnik Arystanbek Muhamedıuly 11 jylǵa bas bostandyǵynan aırylǵan edi.
«Qorǵaýshylar, sottalǵandar jáne olardyń advokattary sot úkimimen kelispeı, shaǵym túsirdi. Astana qalalyq sotynyń sot alqasy shaǵymdardyń dálelderin zerdelep, protseske qatysýshylardy tyńdap, qylmystyq istiń materıaldaryn zerttep, sottalǵandardyń kinásiniń dáleldengeni týraly sot qorytyndylarymen kelisti. Birinshi satydaǵy sot úkiminiń kúshin joıý nemese ózgertý úshin negizder anyqtalmady», - deıdi qalalyq sottan.
A.Muhamedıuly laýazymdyq ókilettikterin teris paıdalana otyryp, kinálige senip tapsyrylǵan bótenniń múlkin talan-tarajǵa salý arqyly asa iri mólsherde urlaýdy uıymdastyrǵany, reıderlik áreketke baǵyttalǵany, ókilettikterin teris paıdalanýdy uıymdastyrǵany úshin (QK 28-babynyń 3-bóligi – 189-baby 4-bóliginiń 2) tarmaǵy, 361-baby 4-bóliginiń 3) tarmaǵy, 24-babynyń 3-bóligi – 249-babynyń 1-bóligi, 28-babynyń 3-bóligi – 250-babynyń 1-bóligi) memlekettik qyzmette qyzmet atqarýǵa ómir boıyna tyıym sala otyryp, 11 jylǵa bas bostandyǵynan aıyrýǵa;
A. Nurazhan kinálige senip tapsyrylǵan bótenniń múlkin talan-tarajǵa salý jolymen, asa iri mólsherde urlaýǵa qatysqany úshin (QK 28-babynyń 2-bóligi – 189-baby 4-bóliginiń 2) tarmaǵy) memlekettik qyzmette qyzmet atqarýǵa ómir boıyna tyıym sala otyryp, 7 jyl 1 aıǵa bas bostandyǵynan aıyrýǵa;
A. Qoshenov jáne A. Sádýaqasova kinálige senip tapsyrylǵan bótenniń múlkin asa iri mólsherde, talan-tarajǵa salý jolymen urlaýǵa járdemdeskeni úshin (QK 28-babynyń 5-bóligi – 189-baby 4-bóliginiń 2) tarmaǵy) kommertsııalyq jáne ózge de uıymdarda 10 jyl merzimge materıaldyq-jaýapty laýazymdarmen aınalysý quqyǵynan aıyryla otyryp, 7 jyl 1 aıǵa bas bostandyǵynan aıyrýǵa, sondaı-aq, A.Sádýaqasovaǵa úkimniń oryndalýyn 5 jylǵa keıinge qaldyrý qoldanyldy;
A. Satýbaldın men L. Kochetov kinálige senip tapsyrylǵan bótenniń múlkin asa iri mólsherde, talan-tarajǵa salý jolymen urlaýǵa qatysqany úshin (QK 28-babynyń 2-bóligi - 189-baby 4-bóliginiń 2) tarmaǵy) memlekettik qyzmette qyzmet atqarýǵa ómir boıyna tyıym sala otyryp, 7 jylǵa bas bostandyǵynan aıyrýǵa;
G. Jýaspaeva ókilettigin asyra paıdalanǵany jáne kórineý jalǵan qujatty paıdalanǵany úshin (QK 250-babynyń 1-bóligi, 385-babynyń 3-bóligi) 2 jylǵa bas bostandyǵynan aıyrýǵa sottalǵan.
Sondaı-aq, G. Jýaspaeva «QR Táýelsizdiginiń 30 jyldyǵyna oraı raqymshylyq jasaý týraly» QR zańynyń negizinde negizgi jazadan, QK 385-baby 3-bóligi boıynsha QK 71-baby 1-bóliginiń 1) tarmaǵy boıynsha eskirý merziminiń ótýine baılanysty qylmystyq jaýaptylyqtan bosatyldy.
Mádenıet jáne sport mınıstrliginiń talaby qanaǵattandyrylyp, 3,5 mlrd teńgeden astam somada keltirilgen zalal óndirildi.
Úkim zańdy kúshine endi.
Aıta keteıik, Ulttyq mýzeıdiń burynǵy dırektory Arystanbek Muhamedıuly 2022 jyly 28 mamyrda qamaýǵa alynǵan edi.
Antıkor mýzeı basshysyna «Altyn adamnyń álem mýzeılerine sherýi» halyqaralyq kórmesin ótkizý barysynda qarjy jymqyrdy degen aıyp taqty.
