Apellıatsııa soty 35 mln teńge para alǵan Oljas Aǵabekovtyń úkimin ózgerissiz qaldyrdy
ASTANA. KAZINFORM — Apellıatsııa alqasy Halyqaralyq jasyl tehnologııalar ortalyǵy basqarma tóraǵasy Oljas Aǵabekovke shyqqan úkimdi ózgerissiz qaldyrdy.
Astana qalasynyń qylmystyq ister jónindegi aýdanaralyq soty Oljas Aǵabekovty iri mólsherde para alý (QK 366-baby 3-bóliginiń 3-tarmaǵy), asa iri mólsherde alaıaqtyq jasaý (QK 190-baby 4-bóliginiń 2-tarmaǵy) jáne laýazymdyq ókilettigin asyra paıdalaný (QK 361-baby 4-bóliginiń 3-tarmaǵy) boıynsha kináli dep tanydy.
Osy jyldyń tamyzynda O. Aǵabekov memlekettik qyzmette jáne kvazımemlekettik sektorda laýazym atqarý quqyǵynan ómir boıyna aıyryla otyryp, túpkilikti 9 jylǵa bas bostandyǵynan aıyrylǵan.
Aǵabekov QR Ekologııa jáne tabıǵı resýrstar mınıstrliginiń «Halyqaralyq jasyl tehnologııalar jáne ınvestıtsııalyq jobalar ortalyǵy» KeAQ basqarma tóraǵasy laýazymyn atqara otyryp 2023 jyldyń 6 sáýiri men 11 jeltoqsany aralyǵynda ózine, sondaı-aq basqarma orynbasaryna, ishki aýdıt qyzmetiniń basshysyna jáne korporatıvtik hatshyǵa 2022 jyldyń nátıjesi boıynsha iri mólsherde 8 220 166 teńge syıaqy tólegen.
2023 jyldyń 30 qarashasy men 4 jeltoqsany aralyǵynda Dýbaı qalasynda (BAÁ) ótken klımattyq jaǵdaı boıynsha taraptardyń 28 konferentsııasynda Ortalyq Azııa elderiniń pavılonyn uıymdastyryp, demeýshilik kómekten túsken 329 mln teńgeniń 121 mln teńgesin alaıaqtyq jolmen ıelenip alǵan.
2024 jyldyń 1 aqpanynda ol quny 1 mlrd teńgeden asatyn 708 myń tonna kólemindegi JShS-niń biriniń ofsettik birlikterin basqa JShS-ǵa satýǵa yqpal etkeni úshin Astana qalasynda S-dan 35 mln teńge para alǵan.
Sottalǵannyń kinási jábirlenýshilerdiń ókilderi men kýálerdiń aıǵaqtarymen, tekserý aktilerimen, júrgizilgen tintý nátıjelerimen, telefondardan málimetterdi alý hattamalarymen, beınejazbalarmen, mamandardyń qorytyndylarymen, saraptama aktisimen jáne qylmystyq istiń basqa da materıaldarymen dáleldengen.
Úkimmen kelispeı sottalǵan men qorǵaýshysy apellıatsııalyq shaǵym berip, aqtaýdy surady.
Astana qalalyq sotynyń qylmystyq ister jónindegi sot alqasynyń 25 qyrkúıektegi qaýlysymen úkim ózgerissiz, apellıatsııalyq shaǵym qanaǵattandyrylmady.
Sot aktisi zańdy kúshine endi.
