Apellıatsııa anasyna bergen eki qyzdy Joǵarǵy sot ákesiniń qamqorlyǵynda qaldyrdy

ASTANA. KAZINFORM — Joǵarǵy sotta ajyrasqan erli-zaıyptylardyń eki balany bólisý daýy qaraldy. 

Erli-zaıyptylar 8 jyl nekede turyp, ajyrasqan. Ajyrasý kezinde sot olardyń kámeletke tolmaǵan eki qyzyn (5 jáne 9 jasar) ákesimen birge turady dep sheshti. 

Anasynan ákesiniń paıdasyna olardy asyrap-baǵýǵa — olar kámeletke tolǵanǵa deıin aı saıyn jalaqysynyń jáne ózge de tabysynyń 1/3 bóligi, ıaǵnı alıment óndirip alyndy.

Apellıatsııa bul sheshimdi ózgertti: balalardy anasyna qaldyryp, onyń paıdasyna ákesinen alıment óndirdi. Qyzdardyń ákesi bul sheshimge kassatsııada qarsylyq bildirdi.

Joǵarǵy sottyń azamattyq ister jónindegi sot alqasy isti zerdeledi. 

Birinshi satydaǵy sot balalardyń ákesimen turǵany jón dep taýyp, anasynyń ata-ana mindetterinen óz betinshe shettetilgenin atap ótti. Balalardy asyraý men tárbıeleý aýyrtpalyǵyn olardyń ákesi kótergen.

Apellıatsııa ata-ana mindetinen jaltarý kinásin rastaıtyn qujattardyń joqtyǵyn, sondaı-aq balalardyń jasyn, jynysyn jáne olardyń ana qamqorlyǵyna muqtajdyǵyn eskere otyryp, balalardyń anasymen turǵany jón dep tapqan. 

Joǵarǵy sot 1989 jylǵy BUU-nyń Bala quqyqtary týraly konventsııasy balalarǵa qatysty búkil is-qımylda birinshi kezekte olardyń múddesin neǵurlym jaqsy qamtamasyz etýge nazar aýdarýdy mindetteıtinin atap ótip, apellıatsııa ustanymymen kelisken joq.

«Joǵarǵy sot alqasy balalardyń anasymen birge turýy olardyń múddesine qaıshy keletinin atap ótti. Áıeldiń spırttik ishimdik ishýinen otbasynda janjal bolady, balalarǵa kútim men qamqorlyq jasalmaıdy. Buǵan kýágerlerdiń aıǵaqtary kýá. Birinshi satydaǵy sot qyzdardyń týǵannan ákesimen birge turatynyn eskerdi, bul — olar úshin úırenshikti jaǵdaı. Sot sheshimi zańdy kúshine engennen keıin anasy qyzdaryn ózine alǵan joq, olar áli kúnge deıin ákesimen birge turady» deıdi Joǵarǵy sottan.

Bul rette anasy olarǵa barmaǵan, jalpy mekteptik is-sharalarǵa jáne ata-analar jınalysyna qatyspaǵan, qyzdardyń ómirine aralasýǵa qulshynys tanytpaǵan.

Ákesiniń úıinde balalarǵa salaýatty damý úshin barlyq jaǵdaı jasalǵan. Qyzdarmen qalyptasqan ózara qarym-qatynastyń sıpaty olardyń ákesine degen súıispenshiligin aıǵaqtaıdy.

Joǵarǵy sot balalardyń ákesimen turǵanyn jón dep taýyp, apellıatsııalyq sot aktisiniń kúshin joıdy.