Apellıatsııalyq sot eki aıaǵynan aırylǵan Parafıevanyń aryzyn qanaǵattandyrmady
ALMATY. QazAqparat - Jol apatynda kináli dep tabylǵan avtobýs júrgizýshisi Dáýren Jańabaevqa qatysty shyqqan sot úkimi ózgerissiz qaldy, dep habarlaıdy QazAqparat tilshisi qalalyq sottyń baspasóz qyzmetine silteme jasap.
Baspasóz qyzmetiniń habarlaýynsha, apellıatsııalyq sot úkimdi ózgerissiz qaldyrdy.
Almaly aýdandyq soty Dáýren Jańabaevty 2 jylǵa bas bostandyǵyn shektep, 2 mln teńge moraldyq shyǵyn tóleýge úkim shyǵarǵan bolatyn.
Ekaterına Parafıevanyń qorǵaýshysy Janna Ýrazbahova apellıatsııalyq shaǵymda moraldyq shyǵyndy 2 mln teńgeden 10 mln teńgege jetkizýdi suraǵan bolatyn.
Sonymen qatar, jábirlenýshi tarap Toıota Kamrı júrgizýshisi men avtobýs ıesinen de moraldyq shyǵyn daýlamaqshy bolǵan.
Parafıeva sot úkimimen kelispeıtindigin aıtqan bolatyn.
«Meniń densaýlyǵymdy 2 mln teńgege baǵalaý durys emes dep sanaımyn. Qazir tıisti organdar meniń qıraǵan kóligimdi 2 mln teńgege baǵalap otyr. Sonda temir men meniń densaýlyǵymnyń quny birdeı bolyp tur», - dedi E. Parafıeva.
Eske sala keteıik, E. Parafıeva 16 maýsymda Almaty qalasyndaǵy ál-Farabı dańǵylynda bolǵan jol apatynan japa shekken bolatyn. Honda CRV kóligin tizgindegen qyzdar ashyq lıýkke kirip ketip, kólik dóńgelegin jaryp alǵan. Sodan jol shetine toqtap, syrtqa shyǵyp, kólikterin qarap jatqan kezde ortańǵy jolaqta kele jatqan Toyota Camry mashınasyn avtobýs soqqan. Qatty soqqydan Toyota Camry aınalyp, artqy jaǵymen Honda CRV kóligin urǵan. Sonyń saldarynan qyzdar ortada qysylyp qalyp, bireýi eki aıaǵynan aıyryldy.
