Apellıatsııa soty Óskemen ákimine aıyppul salǵan úkimniń kúshin joıdy

ÓSKEMEN. QazAqparat – ShQO apellıatsııa soty Óskemen ákimi Jaqsylyq Omarǵa aıyppul salatyn úkimniń kúshin joıdy, dep habarlaıdy QazAqparat tilshisi.

Óskemen ákimi men qalalyq turǵyn úı-kommýnaldyq sharýashylyq bólimine qatysty sot isi oblystyq mamandandyrylǵan aýdanaralyq ákimshilik sotynda qaralǵan bolatyn.

Ablaketka kentiniń turǵyndary qoǵamdyq kóliktiń kestege sáıkes qatynamaıtynyna narazylyq bildirip, sot arqyly shaǵym túsirgen.

Daýdy medıatsııa tártibimen retteý týraly kelisimge sáıkes, ákimdik 16 naýryzǵa deıin avtobýstardyń ýaqtyly qatynaýyn qamtamasyz etýge tıis edi.

Alaıda bul mindet oryndalmaǵandyqtan qala ákimi men turǵyn úı-kommýnaldyq sharýashylyq bólimine 50 AEK nemese 159 000 tenge kóleminde aıyppul salynǵan.

Alaıda apellıatsııa soty bul úkimniń kúshin joıyp otyr.

Shahar basshysynyń baspasóz hatshysy Vladımır Zemlıanskııdiń aıtýynsha, aıtylǵan mindettemelerdi oryndaý úshin ákimdik 3 aqpanda jańa tasymaldaýshy kompanııany bekitý maqsatynda tender jarııalaǵan.

«Dese de, qaladaǵy tasymaldaýshylardyń eshqaısysy oǵan qatysqysy kelmegendikten tender ótpeı qaldy. Sondyqtan qaıta tender jarııalaýǵa májbúr boldyq. 20 sáýirde tasymaldaýshy kompanııa tabylyp, kelisimshart jasaldy. Al sot 18 sáýirde, budan eki kún buryn ótti. ıAǵnı, mindetterdiń ýaqtyly oryndalmaýy bizge baılanysty emes sebepterden bolǵan. Konkýrs rásimderiniń jyldam ótýine TÚKSh bólimi de, qala ákimi de áser ete almaıdy», - dedi ol.