Apellıatsııa Qańtar oqıǵasyna qatysyp, 16 jylǵa sottalǵan qyzylordalyqtyń úkimin ózgertpedi
Birinshi saty soty P-ny 16 jylǵa bas bostandyǵynan aıyryp, O. qaıtys bolýyna baılanysty qylmystyq jaýapkershilikten bosatylǵan.
Advokattar úkimge shaǵymdanyp, onyń kúshin joıýdy jáne sottalǵandardy aqtaýdy suraǵan bolatyn.
Negizinde P. QR Qylmystyq kodeksiniń 272-baby 1-bóligimen (jappaı tártipsizdikti uıymdastyrý ), 380-1-baby 2-bóliginiń 5), 6) tarmaqtarymen (basqa adamdardyń ómirine qaýipti tásilmen, adamdar toby bolyp quqyq qorǵaý organy qyzmetkerin qazaǵa ushyratýǵa baǵyttalǵan qasaqana áreketter), 24- baby 3- bóligi 291-baby 4-bóliginiń 2) tarmaǵymen (ómirge nemese densaýlyqqa qaýipti kúsh qoldanyp ne sondaı kúsh qoldaný qaterin tóndirip atys qarýyn jymqyrýǵa ne qorqytyp alýǵa oqtalý) aıyp taǵylǵan.
«Al O. boıynsha QR Qylmystyq kodeksiniń 272-baby 2-bóligimen (jappaı tártipsizdikke qatysý), 269-1-baby 2-bóliginiń 2), 4) tarmaqtarymen (kúsh qoldanyp ne ony qoldaný qaterin tóndirip, adamdar tobymen áskerı quralymdar kúzetetin obektige zańsyz kirý), 380-1 baby 2-bóliginiń 5),6) tarmaqtarymen (basqa adamdardyń ómirine qaýipti tásilmen, adamdar toby bolyp quqyq qorǵaý organy qyzmetkerin qazaǵa ushyratýǵa baǵyttalǵan qasaqana áreketter) is qozǵaldy», - dep málim etti Qyzylorda oblystyq sotynan.
Sot barysynda P. 2021 jyldyń jeltoqsan aıynda Qyzylordada zırat janynda adamdardy jınap, 2022 jyly 4 qańtarda «Aray City Mall» saýda úıiniń aldynda, oblystyq ákimdik ǵımaratynda, jergilikti jol polıtsııa basqarmasynda bolǵan jappaı tártipsizdikti uıymdastyrǵan.
«Atys qarýyn jymqyrý maqsatynda ol aldyn ala tapsyrys berip, polıtsııa ǵımaratynyń syzbasyn alǵan. Qylmystyq áreketin aıaqtaýǵa polıtsııa qyzmetkerleriniń qarsylyǵy kedergi bolǵan. Jappaı tártipsizdik kezinde P. jol polıtsııasy departamenti ǵımaratynyń janynda óz adamdaryna oq atýdy buıyrdy. Al O. jappaı tártipsizdikke qatysyp, ákimdik pen jol polıtsııasy ǵımarattaryna zańsyz kirgen. Ol P-nyń buıryǵymen polıtsııa qyzmetkerin atyp, oǵan aýyr dene jaraqatyn salǵan. Qarýly qaqtyǵys kezinde oqıǵa ornynda qaza tapqan. Sottalýshylardyń kinási kýálardyń aıǵaqtarymen, beınejazbamen, saraptama qorytyndylarymen, zattaı dáleldemelermen dáleldenedi. Apellıatsııalyq sot alqasynda úkimdi ózgertýge nemese kúshin joıýǵa negiz bolǵan joq. Osyǵan oraı úkim ózgerissiz, apellıatsııalyq shaǵym qanaǵattandyrylmady. Sot úkimi zańdy kúshine endi», - dep tolyqtyrdy oblystyq sottan.
Eske salsaq, budan buryn Qazalyda jasóspirimdi uryp-soqqan 3 oqýshyǵa sot úkimi shyqty.
