Apattyń aldyn alýda salǵyrttyq tanytqan Tótenshe jaǵdaılar mınıstrligine uıymdyq jáne qurylymdyq ózgerister jasaý qajet - A. Smaıyl

Al aýa raıy qubylmaly, jer kólemi ushan-teńiz keń baıtaq respýblıkamyzǵa jedel qımyldaıtyn mınıstrlik, ushqyr oılaıtyn mınıstr kerek. Búgin QR Parlamenti Májilisiniń jalpy otyrysynda óńirlerde oryn alyp otyrǵan tabıǵı apattarǵa baılanysty pikirin bildirgen depýtat Aldan Smaıyl osylaı málimdedi, dep habarlaıdy QazAqparat.

«Almaty oblysynyń Qyzylaǵash aýylynda bolǵan qaıǵyly oqıǵa Tótenshe jaǵdaılar mınıstrligi men onyń óńirlerdegi qurylymdarynyń tabıǵat apattarynyń aldyn alýǵa uıymdastyrý deńgeıi jaǵynan da, tehnıkalyq múmkindigi men moraldyq jaýapkershilik jaǵynan da qabiletsiz ekenin kórsetti. Mınıstrliktiń tasqyn týdyrý qaýpi bar sý qoımalary men toǵandardy bıylǵy qarly qysta erte anyqtap, olardaǵy sý qorynyń deńgeıin udaıy baqylaýda ustamaýy qylmysqa para-par beıǵamdyq. Mundaı jaıbaraqattyqty mınıstrlik te, onyń basshysy V. Bojko da eshqandaı sebeptermen aqtaı almaıdy. Qazaqstan tolaǵaı taý oranǵan Tájikstan men Qyrǵyzstan emes. Qatal minez tanytqan qaharly jylda eki-úsh taýly óńirdi qadaǵalaı almaý nemquraıdylyqtyń óreskel kórinisi», dedi A. Smaıyl.

Depýtat Tótenshe jaǵdaılar mınıstrliginiń qazirgi deńgeıin apattyń aldyn alýshy emes, mindeti men negizgi qyzmetin apattardan soń ǵana eske túsiretin uıqydaǵy uıymǵa kóbirek uqsatady. Buǵan dálel retinde depýtat Shyǵys Qazaqstan oblysyndaǵy qalyń qardan kóktem qaterli bolatynyn bile tura erterek dabyl qaǵylmaǵanyn alǵa tartady,. Al bundaı mınıstrliktiń tarapynan ketken salǵyrttyq tutas óńirlerdi qyrýar materıaldyq jáne moraldyq shyǵynǵa ushyrap otyr.

«Osynyń bári Tótenshe jaǵdaılar mınıstrliginde uıymdyq jáne qurylymdyq ózgerister jasaý qajet ekendigin kórsetedi. Aýa raıy qubylmaly, jer kólemi ushan-teńiz Qazaqstan sekildi keń baıtaq respýblıkaǵa jedel qımyldaıtyn mınıstrlik, ushqyr oılaıtyn mınıstr kerek. Osy jerde kárli qysta jemshóbi taýsylyp, órisi tarylǵan sharýa adamyna der kezinde kómek kórsete almaǵan Aýyl sharýashylyǵy mınıstrligine de eldiń renishti ekenin atap aıtýǵa tıispiz. Mınıstrlik basqasyn bylaı qoıǵanda, qyrylýdan aman qalǵan maldy ári qaraı saqtaýdy da uıymdastyra almaı otyr. Arzan paıda kózdegender qysylǵan elden maldy sý teginge áketip jatyr», degen depýtat apatty óńirge qatysty usynystaryn da jarııalady. Ol osy oraıda, mal-múlkinen aıyrylǵan aýyldar turǵyndarynyń joǵary oqý oryndarynda aqyly bilim alyp jatqan jastaryna memlekettik grant berý týraly depýtat N. Sábılıanovtyń usynysyn qoldaıtyndyǵyn atap ótti. «Budan bólek, osy eldi mekenderdegi sharýa qojalyqtaryn bir jylǵa salyqtyń barlyq túrinen bosatý qajet dep sanaımyz. Olar tabıǵat apatynan turalaǵan sharýasyn qaıta qalpyna keltirgenshe memlekettiń osyndaı jeńildikterin paıdalanýǵa tıis», dedi A. Smaıyl.