Apattyq jaǵdaıdaǵy 41 gıdrotehnıkalyq qurylystar qaıta salynady

ASTANA. QazAqparat  - 5 jylda jańa 22 sý qoımasynyń qurylysy iske asyrylady. Bul týraly búgin Parlament Senatynda agroónerkásiptik keshendi damytý taqyrybynda ótken kezdesýde QR Aýyl sharýashylyǵy birinshi vıtse-mınıstri Qaırat Aıtýǵanov málim etti, dep habarlaıdy QazAqparat.

Onyń sózine qaraǵanda, 2017-2021 jyldarǵa arnalǵan agroónerkásiptik keshendi damytý memlekettik baǵdarlamasy aıasynda sý jáne jer resýrstaryn tıimdi paıdalaný eskerilgen.

«Atap aıtqanda, 5 jyldyń ishinde apattyq jaǵdaıdaǵy 41 gıdrotehnıkalyq qurylystar qaıta salynady, sonymen qatar 22 jańa sý qoımasynyń qurylysy júzege asyrylady. Sonymen qatar jerdi sýlandyrý júıesi qalpyna keltiriledi. Nátıjesinde, osy sharalar Memleket basshysynyń tapsyrmasy aıasynda aınalymǵa 600 myń gektardan astam turaqty sýarylatyn jer kólemin engizýge múmkindik beredi. Osy oraıda sýarmaly jerdiń aýmaǵy 2021 jylǵa qaraı 2 mln. gektarǵa jetkizilmek»,-dedi Aıtýǵanov.

Onyń aıtýynsha, aǵymdaǵy jyly turaqty sýarmaly jerlerdi aınalymǵa tartý boıynsha jobany iske asyrý bastalady. Bul turǵyda 35 myń gektar egistik qamtylady. Jobany qarjylandyrý maqsatynda Islam Damý Bankiniń 48,3 mlrd. teńge somasyndaǵy zaım tartylady. 18 naýryzda qaryz týraly kelisim Respýblıkalyq bıýdjettik komıssııamen maquldandy.