Apattyq mektepterge qatysty málimetter naqty emes- Nur Otan partııasy
Elimizdegi apattyq jáne úsh aýysymdaǵy mektepterdiń máselesi kóterilgen jıynda «Nur Otan» partııasynyń ókili Aıkerim Aıtqojına ýaqtyly paıdalanýǵa berilmegen mektepterdi atap ótti. Onyń aıtýynsha, Semeı qalasynyń Bobrovka aýylyndaǵy mektep osy jyldyń 1 tamyzynda berilýi kerek bolǵanymen, 10 tamyzda ǵana qoldanysqa engizilgen. Sol sekildi Jambyl oblysy, Taraz qalasyn Saltanat aýdanyndaǵy mekteptiń berilý ýaqyty bir jarym aıǵa keshiktirilgen. Sonymen qatar, Jańaózen qalasyndaǵy Araı aýdanynda 27 sáýirde berilmek bolǵan balabaqshanyń lentasy 28 mamyrda qıylǵan.
«Ortalyq apparat pen BǴM arasynda statıstıka boıynsha másele týyndap jatady. Máselen, aldyn ala aqparat tolyqtyrylyp kelmeıtindikten, bizge mınıstrlikke habarlasyp, málimetti qaıta tekserýge týra keledi. Biraq, partııanyń óńirlik fılıaldary bizge mektepterdiń qurylysy boıynsha foto jáne vıdeo túrinde esep beredi. Demek, aımaqtyq komıssııalardyń jumysy málimetterdiń árdaıym shyndyqqa janasa bermeıtinin kórsetedi. Sondyqtan, aldaǵy ýaqytta máselelerge tap bolmaý úshin BǴM aqparattardy berý jumysyn sapaly túrde qarasa jaqsy bolar edi», - dedi partııa ókili.
Ortalyq apparat departamenti basshysy orynbasarynyń aıtýyna qaraǵanda, qurylysy ýaqtyly aıaqtalmaı jatqan nysandarǵa qaıtadan aqsha bere berýdiń qajettigin de teksergen abzal.
«Máseleli nysandardy jergilikti atqarýshy bılikke ysyrýdyń qajeti shamaly sekildi. Olar respýblıkalyq qarajatty ýaqtyly ıgere almaı jatyr. Nemese merdigerlermen baqylaý jumysyn kúsheıtý kerek», - dedi ol.
