Apatty joıýdan bas tartqan qutqarý qyzmetterine jaýapkershilik belgilenedi
ASTANA. QazAqparat - Biliktilik talaptaryna saı kelmeıtin apattyq-qutqarý qyzmetteriniń jaýaptylyǵyn belgileý kerek. Bul týraly Úkimet otyrysynda QR Investıtsııalar jáne damý mınıstri Jeńis Qasymbek málim etti, dep habarlaıdy QazAqparat.
«Jeke apattyq-qutqarý qyzmetteriniń kópshiliginde yqtımal apattardy joıý úshin qajetti jabdyqtary men bilikti personaly joq. 2017 jylǵy mamyrda Atyraý oblysynda «Atyraý munaı» JShS-nyń Daraımola ken ornynda sońy órtke ulasqan gazdyń taralýy boldy. Qaýipti nysan ıesiniń «ABT-test» JShS jeke apattyq-qutqarý qyzmetimen profılaktıkalyq jumystarǵa kelisimsharty bolǵan, biraq ol apatty joıýdan bas tartty. Apat RMK («Kásibı áskerılendirilgen apattyq-qutqarý qyzmeti» RMK) aralasqannan keıin ǵana joıyldy. Osyǵan baılanysty tıisti biliktilik talaptaryna jáne jaraqtandyrý normalaryna saı kelmeıtin apattyq-qutqarý qyzmetteriniń jaýaptylyǵyn belgileý, sondaı-aq osy qyzmet túrin kórsetetin naryqty retteý máselesin qarastyrý usynylady», - deıdi Jeńis Qasymbek.
Bul rette mınıstr kópshilik jaǵdaılarda qaýipti óndiristik nysandardaǵy apattardy joıýdy «Kásibı áskerılendirilgen apattyq-qutqarý qyzmeti» RMK júzege asyratynyn eske salyp ótti. RMK-nyń Qazaqstannyń barlyq óńirlerinde ornalastyrylǵan bólimshelerinde 2200-den asa joǵary bilikti kásibı qutqarýshylary, 600 birlik arnaıy tehnıkasy, 6700 birlik arnaıy maqsattaǵy jabdyqtary bar. RMK-dan basqa, Qazaqstan Respýblıkasynda jekemenshik 40 apattyq-qutqarý qyzmeti bar.
Vedomstvo basshysynyń atap ótýinshe, zamanaýı normalarǵa jáne halyqaralyq tehnologııalyq talaptarǵa sáıkes, ónerkásiptik qaýipsizdik salasyndaǵy normatıvtik quqyqtyq bazany odan ári jetildirý eskerilgen. Mınıstrlik «Qazaqstan Respýblıkasynyń keıbir zańnamalyq aktilerine ónerkásiptik qaýipsizdik máseleleri boıynsha ózgerister men tolyqtyrýlar engizý týraly» zań jobasynyń Tujyrymdamasyn ázirleýde.
Budan buryn habarlanǵandaı, bıylǵy 10 aıda respýblıkanyń qaýipti óndiristik nysandarynda 11 apat oryn aldy, sonyń saldarynan 12 adam zardap shegip, 4-eýi qaza boldy.
