Apatty jaǵdaıda Atyraý áýejaıyna qonǵan ushaq jolaýshylary qonaqúılerge ornalastaryldy
ATYRAÝ. QazAqparat - Reseıdiń Novosıbırsk qalasynan Túrkııa astanasyna bet alyp, apatty jaǵdaıda Atyraý áýejaıyna qonǵan túrkııalyq ushaq jolaýshylary qonaqúılerge ornalastyryldy, dep habarlaıdy QazAqparat.
«Bortynda 190 jolaýshysy bar túrkııalyq ushaqtyń shuǵyl jaǵdaıda qonǵanyn estigen oblys ákimi Nuran Noǵaev Atyraýdyń halyqaralyq áýejaıyn ózi kelip kórdi. Birinshi kezekte eshqandaı zardap shekpegenderine qaramastan jolaýshylarǵa psıhologııalyq kómek kórsetildi. Olardy shuǵyl túrde keden beketinen ótkizip, sý berildi.
Áýejaıǵa avtobýstar da jedel jetti. Olarǵa jolaýshylardy otyrǵyzyp, qonaqúıge aparyp, tamaqtandyryp, ornalastyrdy. Endi jolaýshylarǵa ózderi mingen ushaq jóndelgenshe nemese basqa ushaq kelgenshe qonaqúıde jatýlaryna týra keledi. Jolaýshylar úshin Atyraý tarıhı-ólketaný murajaıyn aralap kórýge de múmkindikter jasaldy. Qonaqúıde medıtsına mamandary men jedel járdem qyzmeti kezekshilikte tur.
Jolaýshylardyń biri basyn jaraqattap alyp, ony aýrýhanaǵa aparyp, qajetti kómekter kórsetildi»,-dedi oblys ákiminiń orynbasary Saǵyndyq Luqpanov.
Aıta keteıik, Boeing -737 ushaǵy Atyraý áýejaıyna jergilikti ýaqyt boıynsha saǵat 10-03-te qondy. Endi Astanadan ushaqty kórý úshin arnaıy mamandar brıgadasy jetýi kerek.
