Apatty úılerde turatyn oraldyqtar jańa páterlerge kóshedi
ORAL. QazAqparat - Búgin Oral qalasynyń ákimi Murat Muqaev memlekettik-jekeshelik áriptestik aıasynda salynyp jatqan kóp qabatty turǵyn úıler qurylysymen tanysty, dep habarlaıdy «QazAqparat» tilshisi.
Qala aýmaǵynda memlekettik-jekeshelik áriptestik aıasynda apatty jaǵdaıdaǵy úılerdi buzý jáne qaıtadan salý jobasy 2015 jyldan beri júzege asyrylýda. Mysaly, ótken jyldyń naýryz, sáýir aılarynda Depovskaıa kóshesi №18, 2-km kóshesindegi №20, 21, 22 úıler turǵyndary kóshirildi. Barlyǵy 43 otbasy, 135 adamǵa qalanyń 5-shaǵynaýdanynan eki jylǵa deıin ýaqytsha qoldaný merzimimen páterler berildi. Bıyl Depovskaıa kóshesi №18 úıdiń ornyna salynǵan 9 qabatty, 90 páterlik úı iske qosylyp, turǵyndar jańa baspanaǵa qol jetkizdi. Al 2-km kóshesi boıyndaǵy buzylǵan úılerdiń ornyna boı kóterip jatqan 6 qabatty turǵyn úıdi «Oral polımer» JShS bıylǵy jyl sońyna deıin aıaqtaýdy kózdep otyr. Sol sekildi Gagarın kóshesi 1/1 mekenjaıyndaǵy apattaǵy jaǵdaıdaǵy 10 páterlik úı buzylyp, ornyna «Karavannyı pýt» JShS 126 páterlik toǵyz qabatty turǵyn úıdi turǵyzýda. Bul nysandy aldaǵy jyldyń tamyz aıynda bitirý josparlanýda.
Sonymen qatar 2017 jyly Qurmanǵazy kóshesi №198 mekenjaıyndaǵy 8 páterlik turǵyn úı buzylǵan edi. Munda «Kazhol» JShS 64 páterlik, 6 qabatty turǵyn úı salýda. Bul úı keler jyly paıdalanýǵa berilmekshi. Gagarın jáne Qurmanǵazy kóshesindegi atalmysh úılerde turǵandar ýaqytsha Zachagan kentine kóshirildi. Sondaı-aq «Oral polımer» JShS jáne «Altaır» JShS qurylys kompanııalary Qurmanǵalıev kóshesi №3 (8 páterlik), Ǵ.Qarash kóshesindegi №33/1, 37 (14 páterlik) úılerdi buzyp, ornyna jańadan salmaqshy. Oǵan qosa Qurmanǵazy kóshesindegi №192, 194, 196, Ábýbákir Kerderi kóshesindegi №181, 183 (páterlerdiń jalpy sany 43) úıler buzylyp, turǵyndar kóshiriledi. Bul úılerdiń ornyna «KazHol» jáne «Karavannyı pýt» JShS jańadan mekender turǵyzady.
Salynyp jatqan turǵyn úıler qurylysymen tanysqan shahar basshysy bul jobanyń Elbasy tapsyrmasyna sáıkes oblys ákiminiń qoldaýymen júzege asyrylyp jatqanyn jetkizdi. Qalada barlyǵy 43 turǵyn úı apatty jaǵdaıda dep tanylsa, bıyl sonyń jeteýi buzylyp, ornyna kóp qabatty úıler salynýda. 2018 jyly taǵy segiz úı buzylmaqshy. Osylaısha, eki jyldyń ishinde 15 úıdiń ornyna sáýletti ǵımarattar boı kótermekshi. Budan eshkim de utylmaıdy. Eń aldymen qalanyń kórki ajarlana tússe, turǵyndar jańa páterdi tegin alady. Merdiger kompanııalar úshin de bul tıimdi. Páterlerdiń bir bóligin turǵyndarǵa bergennen keıin qalǵanyn kommertsııalyq baǵamen nemese «Turǵyn úı qurylys jınaq banki» arqyly satady. Úı salýshy kompanııaǵa jer tegin beriledi ári ınfraqurylym tartý jáne abattandyrý jumystary jergilikti qazyna esebinen júrgiziledi.
Aıta keteıik, bıyl Oral qalasy boıynsha 16 kóp qabatty turǵyn úı (2262 páter, jalpy aýdany - 134,2 myń sharshy metr) qurylysy júrgizilse, sonyń 8-i (1206 páter, 70,5 myń sharshy metr) jyl sońyna deıin paıdalanýǵa berilmekshi. Oǵan qosymsha 16 turǵyn úıdiń jobalyq-smetalyq qujattamalary jasalyp jatsa, sonyń 9-y Zachagan kentinde, jeteýi qalanyń soltústik-shyǵys shaǵynaýdanynda boı kótermek. Bul úılerdi (1800 páter) 2018-2019 jyldary salý josparlanyp otyr.
