«Apatty úıler alańdatady» - respýblıkalyq basylymdarǵa sholý
***
Erteń elorda tórinde ótetin Qazaqstan halqy Assambleıasynyń kezekti sessııasy onyń jumysyn ilgeriletýge jańasha serpin bereri sózsiz. Osy rette «Egemen Qazaqstan» gazeti Assambleıa atqarǵan jumystar týraly aıtyp berý úshin Májilis depýtaty Roman Kımge jolyǵyp, birqatar suraqtarǵa jaýap alǵan. Basylym tilshisiniń barlyq saýalyna tuşymdy jaýap bergen halyq qalaýlysy: «Qazaq jerinde qıyndyqty basynan keshken ártúrli ult ókilderiniń aradaǵy qalyptasqan ózindik tatýlyqtary bar. Qazaq halqy syrttan kelgenderdi qamqorlyǵyna alyp, qoldan kelgen jaqsylyqtaryn jasady. Mine, munyń barlyǵy da osy ultqa degen senimdi arttyryp, onyń aınalasyna toptasýǵa múmkindik berdi. Onyń ústine qazaqtar qashanda tózimdi, qonaqjaı jáne kóregen halyq», - deıdi. Suhbat «Mindetimiz - ortaq iske úles qosý» degen taqyryppen berilgen.
Ońtústik Koreıanyń Pýentaek qalasynda aýyr atletıkadan ótip jatqan Azııa chempıonaty elimiz úshin jaqsy jańalyqpen bastaldy. Chempıonat qarasańynda ótken Halyqaralyq aýyr atletıka federatsııasynyń kongresinde Qazaqstan 2013 jyly erler men áıelder arasyndaǵy Azııa chempıonatyn ótkizý quqyǵyna ıe boldy. Bul jaǵymdy jańalyq «Egemen Qazaqstan» gazetiniń búgingi sanyndaǵy «Azııa chempıonaty Astanada ótedi» degen taqyryptaǵy maqalaǵa arqaý bolǵan. Basylymnyń atap ótýinshe, sonymen qatar elimizge 2014 jylǵy lıtsenzııalyq álem chempıonatyn ótkizý quqyǵyn da berilgen. «Sóıtip, 2013 jyly Astanada sary qurlyqtyń saıypqyrandary bas qosatyn bolsa, 2014 jyly tórtkúl dúnıeniń teńdessizderi Alash topyraǵyn betke alady. Qos jarystyń da tartysty ótetinine esh kúmánimiz joq», - dep jazady basylym.
***
Eki azııalyq, bir eýropalyq, bir afrıkalyq memleket jáne tutas Eýropalyq odaq qazaq elindegi dıplomatııalyq mıssııalaryn jańartty. Keshe Aqordada Qazaqstan Kóshbasshysy osy elderdiń elshilerin qabyldady. Osy eleýli oqıǵa arqaý bolǵan maqala «Aıqyn» gazetiniń búgingi sanynda «Elbasy elshilerdi qabyldady» taqyrybymen berilgen. Elbasy senim gramotalaryn EO-nyń Qazaqstandaǵy Ókildiginiń basshysynan, Grektsııa, OAR, Koreıa, Qyrǵyzstan elderiniń Elshilerinen qabyldady. «Qazaqstan Kóshbasshysy Qyrǵyzstandy «senimdi odaqtasymyz» dep atap, memleketimizdiń osy «baýyrlas halyqty jan-jaqty qoldaýyn jalǵastyratyndyǵyn» málimdedi», -dep jazady basylym.
***
«Alash aınasy» gazetiniń turaqty «Dat!» aıdarynda ánshi, jyrshy-termeshi, Qazaqstannyń eńbek sińirgen qaıratkeri Qatımolla Berdiǵalıevpen aradaǵy suhbat «Mýzykalyq qundylyqtarymyzdy alalaýǵa qarsymyn» degen taqyryppen berilgen. Basylym tilshisiniń barlyq saýaldaryna tuşymdy jaýap bergen aıtysker aqyn: «Tilimiz damyp kele jatyr deımiz. Burynǵyǵa qaraǵanda shúkir ǵoı. Biraq áli órisi tar. Jańa 5 myńdyq teńge shyǵypty. Bir jaǵy - oryssha, bir jaǵy qazaqsha. «Pıat tysıach» degendi jazbasa da, báribir túsinedi ǵoı! Reseıdiń quramynda qanshama avtonomııalyq respýblıka bar. Solardyń qaısysy orys tilin aqshalaryna qosyp otyr? Aqsha kerek adam ózi-aq túsinip alady. Artyq jalpaq sheısheılikten arylǵan jón!», - deıdi.
Osy basylymnyń jazýynsha, sońǵy kezderi úılený toılarynda bir tizbekpen sherýge shyǵatyn kólikter kolonnasynyń jol erejelerin buzatyny jóninde turǵyndar tarapynan aryz-shaǵymdar jıi túsken. Osyǵan oraı Almaty qalasynyń jol polıtsııasy úılený toıy kortejderine talapty kúsheıtip, qatań jaýapkershilikke tartý máselesin qolǵa alyp otyr. Eki kún ishinde Almatyda úılený toıynyń 34 korteji jaýapkershilikke tartylyp úlgergen. Maqala «Toı kortejderine qatań baqylaý» degen taqyryppen berilgen.
***
«Astanada ábden tozyǵy jetip, qabyrǵasy áni-mine qulaǵaly turǵan úılerdiń sany - 228. Jalpy aýmaǵy 150 sharshy metrdi quraıtyn mundaı úılerde shamamen 3000 otbasy ómir súrýde», - dep jazady «Astana aqshamy» beısenbilik sanyndaǵy «Apatty úıler alańdatady» degen taqyryptaǵy maqalasynda. Basylym atap ótýinshe, dál qazirgi ýaqytta 2978 úı qaıta qalpyna keltirýde qajetsinedi. Ótken ǵasyrdyń 40-60-shy jyldary qamystan salynǵan 2,3,4 qabatty úıler jóndeýge múldem kelmeıdi. Al halyq arasynda «hrýşevka» jáne «lenıngradtyq» dep atalatyn 5 qabatty úılerdiń de paıdalaný merzimi 30-50 jylmen shekteledi.
***
«Kazahstanskaıa pravda» gazetiniń jazýynsha, keshe Memleket basshysy Nursultan Nazarbaev Reseı Federatsııasy Memlekettik Dýmasynyń Tóraǵasy Sergeı Naryshkındi qabyldady. Kezdesý barysynda Qazaqstan Prezıdenti S.Naryshkındi Dýmanyń spıkeri qyzmetine taǵaıyndalýymen quttyqtap, eki eldiń Parlamentteri Qazaqstan men Reseıdiń ıntegratsııalyq úderisterinde mańyzdy ról atqaratynyn atap ótti. «Mamyr aıynda tarıhı kelisimge - Qazaqstan men Reseı arasyndaǵy Dostyq, yntymaqtastyq jáne ózara járdem týraly shartqa 20 jyl tolady. Qazirgi kezde bul qujattyń kóptegen baptary júzege asyryldy. Qazaqstan men Reseı arasyndaǵy yntymaqtastyqtyń jańa baǵytyn, sondaı-aq álemde qalyptasyp otyrǵan qazirgi zamanǵy shyndyqty eskere otyryp, atalǵan Shartty jańartý qajet. Jańa ıntegratsııalyq úderister - Keden odaǵynyń, Birtutas ekonomıkalyq keńistiktiń qurylýy jańa mindetter men maqsattardyń qoıylýyn talap etedi», - dedi N.Nazarbaev.
