Apatty úıdiń turǵyndarynda jańa páter alýda qandaı problema bar
ASTANA. QazAqparat - Parlament Senatynyń jalpy otyrysynda depýtat Erbolat Muqaev apatty úıler máselesine qatysty zańnamaǵa tıisti ózgeristerdi qarastyrýdy usyndy. Bul rette birqatar senatorlar QR Premer-Mınıstri Baqytjan Saǵyntaevqa depýtattyq saýal joldady, dep habarlaıdy QazAqparat.
«Búgingi elimizdiń kóptegen qalalarynda apatty jaǵdaıda dep tanylǵan úıler barshylyq. Apatty dep tanylǵan úılerdiń turǵyndary jergilikti atqarýshy organdarda kezekte tirkelgen. Qoldanystaǵy zańnamaǵa sáıkes, jergilikti atqarýshy organdardyń quzyretine avarııalyq jaǵdaıda dep tanylǵan úılerde turyp jatqan azamattardy turǵyn úımen qamtý kózdelgen. Ókinishke qaraı, qoldanystaǵy zań bul máseleni túbegeıli sheshe almaýda. Mysaly, eki qabatty turǵyn úıde 18 otbasy turyp jatyr delik. Olardyń turǵyn úıge tirkelý kezegi ártúrli. Birinshi tirkelgen otbasyn turǵyn úımen qamtamyz etý múmkindigi bolsa, sońǵy tirkelgen otbasynyń 10 jyldan soń kezegi kelýi múmkin. Al apatty jaǵdaıdaǵy úı 10 jyldy kúte almaıdy. Demek, apatty turǵyn úıdegi azamattardyń barlyǵyn bir mezette turǵyn úımen qamtamasyz etý múmkindigi joq», - dep toqtaldy senator.
Osy oraıda E. Muqaev joǵaryda baıandalǵannyń negizinde apatty jaǵdaıdaǵy úılerdi joıý maqsatynda turǵyn úı qurylysyn «Nurly jer» baǵdarlamasynyń bir baǵyty retinde engizýdi, sáıkesinshe qoldanystaǵy zańnamaǵa tıisti ózgerister qarastyrýdy usyndy.
