Apatty úıde turyp jatqan jezqazǵandyqtar bılik nazaryna ilindi
QARAǴANDY. QazAqparat - Qaraǵandy oblysy Jezqazǵan qalasynda kópqabatty úıdiń apatty kireberisin qaıta jóndeýden ótkizý týraly sheshim qabyldandy, dep habarlaıdy «QazAqparat» HAA tilshisi oblys ákiminiń baspasóz qyzmetine silteme jasap.
«Jańa Qurylys» JShS arnaıy mamandanǵan uıymynyń tujyrymyna sáıkes, 2016 jyldyń qarasha aıynda Jezqazǵandaǵy Alasha han kóshesi №33 kópqabatty úıdiń kireberisi apatty dep tanyldy», - delingen habarlamada.
Bılik málimetterine súıensek, jumystardyń smetalyq quny 3,2 mln teńgeni quraıdy.
«Jańa Qurylys» JShS sarapshylar toby úıdi tekserip shyqty jáne jaramdy dep tanydy. №1 apatty kireberiste 15 jeke menshiktegi páter bar», - dep kórsetilgen habarlamada.
Ázirge kireberistiń qıraýynyń aldyn alý úshin qurylys sharalary jasaldy. «Metall tireýishter ýaqytsha qurylymdar ǵana. Olar irgetas pen ýaqytsha qurylmalar nyǵaıǵan soń alynady», - dep túsindirdi oblys ákiminiń baspasóz qyzmeti.
Paneldi kópqabatty úı 1966 jyly turǵyzylǵan. Onda 6 kireberis, 90 páter bar. 
