Apatty úı turǵyndaryn kóshirýge bıýdjetten qarjy bólinbeı otyr – depýtat
Jergilikti atqarýshy organdardyń málimetinshe, respýblıka boıynsha jalpy turǵyn úı qory 54 731 kóppáterli úıdi quraıdy, onyń ishinde 752 úı apatty, 3024 úı tozyǵy jetken dep tanylǵan.
«Atyraý oblysynda 119 apatty úı bar, olardyń bir bóligi Inder, Mahambet, Maqat, Qurmanǵazy aýdandarynda ornalasqan. Óńirdegi saılaýaldy jumysymyzda osyndaı birneshe úıdi araladyq. Bul úılerdiń ishinde ylǵal, kógerý bar, qabyrǵalar men tóbeler jarylǵan, tóbelerden sý aǵady. Mundaı páterlerde ádette zeınetkerler, az qamtylǵan adamdar turady. Olar úshin jaǵdaılaryn jaqsartýdyń jalǵyz úmiti – memlekettiń kómegi. Astanada da osyndaı másele bar, saraptamalar men tehnıkalyq zertteý nátıjesi boıynsha 206-ǵa jýyq úı apatty dep tanylyp, buzylýdy kútip tur», - dedi D. Turǵanov Májilistiń búgingi otyrysynda.
Onyń aıtýynsha, «AMANAT» partııasy bul máselemen birneshe jyldan beri aınalysyp keledi. 2021 jyly óńirlerde turǵyn úı qoryn jańartý baǵdarlamasy bekitildi, onda iske asyrý tetigimen ólshemderi, onyń ishinde jóndeýge jatatyn obektilerdegi úı ıelerine shyǵyndardy óteý tártibi men sharttary belgilengen.
2022 jyldyń sońynda «Atyraý qalasynyń turǵyn úı qoryn jańartýdyń 2022-2026 jyldarǵa arnalǵan baǵdarlamasy» ázirlendi. Bul baǵdarlamaǵa apatty 82 úıden bólek, qaladaǵy taǵy 155 tozyǵy jetken úı kiredi.
Bıylǵy qańtarda «Astana qalasyn damytý máseleleri jónindegi» keńeste Memleket basshysy elorda ákimdigine Úkimetpen birlesip, apatty úılerdi jańartý jáne jańǵyrtý baǵdarlamasyn ázirleýdi tapsyrdy.
«Tájirıbe kórsetkendeı, atalǵan máseleni túbegeıli sheshý úshin tek qana jergilikti bıýdjetten bólinetin qarajat jetkiliksiz, sondyqtan respýblıkalyq bıýdjetten de qarjy qarastyrý kerek. Mysaly, Atyraý oblysyndaǵy apatty úılerdiń turǵyndaryn kóshirýge shamamen 34 mıllıard teńge qajet, Astana qalasy boıynsha 115 mlrd teńge jáne úıdi ınjenerlik-kommýnıkatsııalyq ınfraqurylymmen qamtamasyz etýge qosymsha 117 mlrd teńge kerek. Biraq Qarjy mınıstrligi bul jobalarǵa respýblıkalyq bıýdjetten qarjy bólýdi qoldamaı otyr», - dedi D. Turǵanov.
Sonymen birge, depýtat «Otbasy banki» arqyly nesıelik turǵyn úıdi qarjylandyrý úlgisi boıynsha, turǵyn úı qurylysyn qarjylandyrý úshin oblıgatsııalar shyǵarýdy usyndy.
