Apatty jaǵdaıdaǵy jylý ortalyqtaryn jańǵyrtýdyń jospary bar – Roman Sklıar
ASTANA. KAZINFORM — Premer-Mınıstrdiń birinshi orynbasary Roman Sklıar bıylǵy jylý berý maýsymyndaǵy jaǵdaıǵa túsinik berdi.
Búgin Úkimettiń keńeıtilgen otyrysynan keıin tilshiler jylý berý maýsymyndaǵy kemshilikterdiń jyl saıyn qaıtalanýyna qatysty suraq qoıdy.
«Byltyr jazda «qyzyl aımaqta» ornalasqan eń nashar degen jylý elektr ortalyqtaryna erekshe nazar aýdardyq. Jylý jelilerin qalpyna keltirýge qatysty máselelerdi shuǵyl tártipte qarastyrdyq. Jalpy, qazirgi jylý berý maýsymynyń qalypty rejımde ótip jatqanyn aıtqym keledi. Barlyq energııa kózderi, ıaǵnı problemaly Ekibastuz JEO-sy men Rıdder JEO-sy qalypty jumys istep tur. Ol jerde eleýli apat bolmady. Jylý berý maýsymy aıaqtalǵansha osy jylý elektr ortalyqtarynda problema bolmaıdy dep úmittenemin. Memleket basshysy bul jumysty jalǵastyrý kerek ekenin jáne osy 19 jylý berý nysanyndaǵy jaǵdaıdy durystaýdy, jylý jelilerin retke keltirýdi tapsyrdy», - dedi R. Sklıar.
Úkimet basshysynyń birinshi orynbasary problemaly jylý berý júıeleri kóp ekenin moıyndady.
«Búgin Úkimettiń keńeıtilgen otyrysynda osy jaǵdaıdyń sebepteri de aıtyldy. Bul rette, tarıfte qandaı da bir kiris normasynyń bolmaýy keri áser etti. Tarıfte monopolıster úshin belgili bir tabys normasyn qamtý kerek. Osy jumysty Energetıka mınıstrligi men Ónerkásip mınıstrligi birlesip atqaryp jatyr. Alda kóp jumys bar, bosańsýǵa bolmaıdy. Ár qys jyly nemese óte sýyq bolýy múmkin, biraq qys qatal bolsa, qatelikterimizdi keshirmeıdi», - dedi ol.
Sonymen qatar R. Sklıar árbir stantsııany jańǵyrtýdyń jeke jospary bar ekenin naqtylady.
Búgin Úkimettiń keńeıtilgen otyrysynda Prezıdent Qasym-Jomart Toqaev jyl saıyn jylytý maýsymynda sol bir problemalar qaıtalana beretinin, memlekettik organdar qatelikter men olqylyqtardan sabaq almaı jatqanyn synǵa aldy. Úkimet, eń aldymen, bıyl apatty jaǵdaıdaǵy 19 jylý ortalyǵyn jańǵyrtý jumystaryn aıaqtaýǵa tıis.
