Atyraýdaǵy apatty jaǵdaıda turǵan psıhdıspanser jalǵa alýǵa ǵımarat izdep jatyr
ATYRAÝ. KAZINFORM — Atyraý oblystyq psıhıkalyq densaýlyq ortalyǵy jańa ǵımarat izdep jatyr. Qazir mekeme 87 jyl buryn salynǵan eski ǵımaratta jumys istep otyr. Al ortalyqqa arnalǵan jańa ǵımarattyń jobasy memlekettik saraptamadan shyqqan joq.
Ortalyqtyń jańa ǵımaratqa muqtaj ekeni buǵan deıin de aıtylǵan. Jańa nysan salý týraly usynys 2008 jyldan beri kóterilip keledi. Biraq osy ýaqytqa deıin bul másele tolyq sheshimin tappaǵan.
Endi ortalyq ýaqytsha jańa ǵımaratty jalǵa almaq. Memlekettik satyp alý portalynda kórsetilgen jańa nysannyń aýmaǵy keminde 2100 sharshy metr bolýy kerek dep kórsetilgen. Ǵımaratta keminde 50 kabınet pen 125 adamǵa arnalǵan oryn bolýǵa tıis.
Sonymen qatar ǵımarat daıyn kúıde bolýy kerek, ıaǵnı ony jalǵa alǵannan keıin qosymsha jóndeý júrgizýdiń qajeti bolmaýy tıis. Nysanda sý, jylý, jaryq, káriz júıesi, jeldetý jáne basqa qajetti jaǵdaılar bolýy qajet.
Qazirgi ýaqytta ortalyqta 110 naýqas em alyp jatyr.
Ǵımarat Atyraý qalasynda ornalasýy kerek. Oǵan qoǵamdyq kólikpen jetý yńǵaıly bolýy, jedel járdem kóliginiń kirip-shyǵýyna múmkindik bolýǵa tıis. Sondaı-aq ortalyqtyń ereksheligine baılanysty nysan adam kóp jınalatyn jerlerden oqshaý ornalasýy qajet.
Jańa ǵımaratty jalǵa alýǵa 54,3 mln teńgeden astam qarjy qarastyrylǵan. Jaldaý merzimi 2026 jyldyń sońyna deıin belgilengen.
Oblystyq densaýlyq saqtaý basqarmasy bul sheshimdi ǵımarattyń apatty jaǵdaıda bolýymen baılanystyryp otyr.
Buǵan deıin ortalyqqa jańa ǵımarat salý úshin jer telimi de bólingen. Aldymen jer Talqaırań aýylynan berilse, keıin Almaly aýylynan bólindi. 180 orynǵa arnalǵan joba da ázirlengen. Alaıda joba iske aspaı qaldy. Jobalyq-smetalyq qujattama birneshe ret ózgertilgen. Buǵan deıin densaýlyq saqtaý basqarmasy jobalaý jumystary aıaqtalǵanyn habarlaǵan edi. Alaıda qurylys basqarmasynyń sońǵy málimetine sáıkes, joba áli memlekettik saraptamadan ótken joq.
Buǵan deıin Atyraý oblysynda bir otbasynan eki adam Kongo-Qyrym gemorragııalyq qyzbasyna baılanysty ınfektsııalyq aýrýhanada em alyp jatqanyn jazǵan edik.
