Apatty úıde de qalýǵa daıynbyz: Sarandaǵy RTI turǵyndary kóshýge qarsy
SARAN. KAZINFORM – Saran qalasynda RTI shaǵyn aýdanyndaǵy eski kópqabatty úı tóńireginde daýly jaǵdaı týyndady.
Sarapshylar ony apatty ári turýǵa qaýipti dep tanyǵanymen, turǵyndardyń kóbi páterlerin bosatýdan úzildi-kesildi bas tartýda. Olar uzaq jyldar boıy tozyǵy jetken baspanada ómir súrip, óz kúshimen úıdi kútip-ustap kelgenin aıtyp, «qalaı da osynda qalamyz» dep tabandap otyr.
№149-153 úıdi jurt kópten beri «ótkenniń elesi» dep ataıdy. Bir kezderi munda ómir qaınap jatsa, ýaqyt óte kireberister qańyrap bos qaldy, tóbesi aǵyp, kommýnıkatsııalar isten shyqty.
Búginde tek tórt kireberis qana turǵyndarǵa jaramdy. Qonys aýdarmaǵandar sý, jaryq, káriz júıesin óz qarajattaryna jóndep, shatyrdy jamap, jylý qosýǵa da árekettengen. Biraq adamdar bar kúshin salyp, jóndeý jumystaryn aıaqtaı bergende ákimdik arnaıy saraptama jasatyp, úı apatty jaǵdaıda degen qorytyndy aldy.
Bılik ókilderi turǵyndarǵa bul jerde qalý qaýipti ekenin eskertip otyr.
– Kúıeýim – ekinshi toptaǵy múgedek, ózimniń júregim aýyrady. Bizdi jataqhanaǵa nemese ınternatqa kóshirýge bolmaıdy, densaýlyǵymyz kótermeıdi. Qajet bolsa, tyıym sala bersin, biraq biz durys páter berilgenshe osy jerde qalamyz, – deıdi turǵyn Galına Fadeeva.
Bul pikirdi Vera Tkachenko da qoldaıdy.
– Úı qulamaıdy. Qalasańyzdar, qolhat jazyp bereıik. Jeti jyl boıy qabyrǵalardy sylap otyrmyz, biraq birde-bir jańa jaryq paıda bolǵan joq, – deıdi ol.
Azamattar óz ómirlerine jaýap berýge daıyn ekenin aıtyp, qujat rásimdep, jańa páter kiltin alǵansha keminde eki aı ýaqyt suraıdy.
– Biz osynda talaı jyl kún keshtik. Taǵy az ýaqyt turyp, keıin ǵana tynysh kóshkimiz keledi, – deıdi turǵyn Krıstına Smagına.
Alaıda Saran qalasynyń ákimi Daryn Bulqaıyr bul pikirmen kelispeıdi.
– Úıdiń tirek konstrýktsııalary buzylǵan, ol kez kelgen sátte qulap qalýy yqtımal. Biz úshin eń mańyzdysy – azamattardyń ómiri men densaýlyǵy. Sondyqtan kóshirý týraly sheshim qabyldandy, – dep túsindirdi ol.
Ákimdiktiń dereginshe, ýaqytsha baspana shyn máninde úıde turyp jatqan 17–20 otbasyna ǵana berilmek. Qalada páter qory bar: RTI shaǵyn aýdanynda jańa 150 úı salynǵan, sonyń úshten biri apatty úıdiń turǵyndaryna bólinýi múmkin. Biraq ol úshin zańǵa sáıkes kezekke turyp, barlyq rásimderdi ótý qajet.
– Barlyǵyna baspana jetkilikti. Biraq biz zańdy saqtaýymyz kerek. Artyqshylyq – jalǵyz baspanasy barlarǵa beriledi. Eń uzaq degenniń ózinde eki aı ǵana kútý kerek, – dedi Daryn Bulqaıyr.
Al turǵyndar mektep ne jataqhanadaǵy ýaqytsha bólmelerge kóshýge úzildi-kesildi qarsy. Olar mundaı jerlerde sanıtarlyq jaǵdaıdyń tómendigine, qarttar men balalarǵa qolaısyz orta bolady dep alańdaıdy.
Osylaısha Sarandaǵy daýly jaǵdaıdyń áli de ortaq sheshimi tabylǵan joq: bir tarap úı kez kelgen sátte qıraıdy dep qaýiptense, ekinshi tarap «bizdiń baspanamyz áli uzaq jyl turady» dep senedi. Biraq ózgermeıtin bir nárse bar – turǵyndar jańa páterdiń kilti qoldaryna tıgenshe úıden ketpeımiz dep otyr.
Eske salsaq, «Qazaqstan aýmaǵynda apatty jaǵdaıdaǵy úılerdiń sany qansha jáne olar kóbine qaı óńirlerde?» degen suraqqa Ónerkásip jáne qurylys mınıstrligi jaýap bergen bolatyn.