Apatty úı turǵyndaryna baspana bólý quzyreti ákimdikterge qaıtaryldy
ASTANA. KAZINFORM – Qazaqstanda jalǵyz baspanasy apatty dep tanylǵan azamattarǵa turǵyn úı bólýge qatysty ózgeris engizildi. Endi jergilikti bıýdjet esebinen salynǵan nemese satyp alynǵan baspanany olarǵa bólý máselesin ákimdikter qaraıdy. Bul týraly OKQ ótken baspasóz májilisinde QR Ónerkásip jáne qurylys mınıstrliginiń Qurylys jáne turǵyn úı-kommýnaldyq sharýashylyq isteri komıtetiniń tóraǵasy Baqytjan Júnisbekov málimdedi.
Buǵan deıin jalǵyz baspanasy apatty dep tanylǵan azamattardy baspanamen qamtý isi «Otbasy banki» arqyly júrgiziletin.
– Endi jergilikti bıýdjet esebinen salynǵan nemese satyp alynǵan turǵyn úılerdi mundaı azamattarǵa bólý quzyreti ákimdikterge qaıtaryldy. Baspanany bólý týraly sheshim komıssııa arqyly qabyldanady, - dedi spıker.
Aıta keteıik, 2025 jyldyń mamyrynan bastap turǵyn úıge muqtaj azamattardy esepke alý jáne baspana bólý qyzmetteri ákimdikterden «Otbasy bankine» berilgen. Al ákimdikter kommýnaldyq turǵyn úı salý nemese satyp alý jáne azamattardy qonystandyrý jumystaryn atqarýmen shektelgen edi.
Eske salaıyq, buǵan deıin apatty turǵyn úılerdi renovatsııalaýǵa jańa kepildik tetigi engizilgeni habarlandy.
