Apatty turǵyn úılerdi renovatsııalaýǵa jańa kepildik tetigi engizildi
ASTANA.KAZINFORM — «Qazaqstandyq turǵyn úı kompanııasy» AQ-nyń apatty jáne tozyǵy jetken turǵyn úılerdi renovatsııalaýǵa beretin kepildigi ınjenerlik-kommýnıkatsııalyq ınfraqurylymdy júrgizýge jumsalatyn bıýdjet shyǵystaryn ońtaılandyrýǵa múmkindik beredi.
— «Qazaqstandyq turǵyn úı kompanııasy» apatty jáne tozyǵy jetken turǵyn úılerdi renovatsııalaýǵa arnalǵan jańa ónim kepildik berý tetigin ázirledi. Bul qural renovatsııalaý jobalaryna jeke ınvestıtsııalardy tartýǵa baǵyttalǵan jáne úlestik qurylys týraly zańnamada belgilengen tártipke uqsas turǵyn úı menshik ıeleriniń quqyqtaryn tolyq qorǵaýdy qamtamasyz etedi. Renovatsııalaý barysynda turǵyndar óz páterlerin «bólmege — bólme» qaǵıdaty boıynsha jańa turǵyn úıge aıyrbastaı alady, al qurylys salýshylar «Qazaqstandyq turǵyn úı kompanııasy» AQ-nyń kepildigin paıdalaný múmkindigine ıe bolady, — dedi Ónerkásip jáne qurylys mınıstrligi Qurylys jáne turǵyn úı-kommýnaldyq sharýashylyq isteri komıteti tóraǵasynyń orynbasary Qanat Myńbaev Ortalyq kommýnıkatsııalar qyzmetinde ótken brıfıngte.
Onyń aıtýynsha, kepildik berý tetigi taraptardyń mindetterin naqty aıqyndaıdy. Atap aıtqanda, ákimdik renovatsııalaý aýmaǵyn belgileıdi, jobaǵa engiziletin nysandardyń tizimin jarııalaıdy jáne qajet bolǵan jaǵdaıda ınjenerlik-kommýnıkatsııalyq ınfraqurylymdy tartady.
Al qurylys salýshy «Qazaqstandyq turǵyn úı kompanııasy» men renovatsııalaý týraly kelisim jasasady, turǵyndarmen kelissózder júrgizedi, olardyń múlkin «bólmege — bólme» qaǵıdaty boıynsha qurylys salýshyǵa berý jónindegi kelisimderin jınaıdy. Budan keıin renovatsııa aıasynda kepildik berý týraly shart jasasý úshin osy kompanııaǵa júginedi jáne tozyǵy jetken turǵyn úılerdi buzyp, jańa kóppáterli turǵyn úıdiń qurylysyn júzege asyrady.
Óz kezeginde «Qazaqstandyq turǵyn úı kompanııasy» barlyq turǵynnyń kelisimi alynǵannan keıin renovatsııa aıasyndaǵy kepildik berý týraly shartqa qosylyp, qurylys salýshyǵa kepildik beredi.
Al turǵyn úı menshik ıeleri ýákiletti kompanııamen turǵyn úı qurylysyna úlestik qatysý týraly shart jasasady. Renovatsııa aıasyndaǵy kepildik berý týraly shartta jobany kezeń-kezeńimen iske asyrý kózdelgen. Atap aıtqanda, qurylysqa qajetti qujattardy daıyndaýdan bastap nysandy paıdalanýǵa bergenge deıingi barlyq kezeń qamtylady. Sondaı-aq jobalaý-smetalyq qujattamany ázirleý kezinde saqtalýy tıis tehnıkalyq-ekonomıkalyq kórsetkishter men basqa da mindetti talaptar belgilenedi.
Spıkerdiń aıtýynsha, «Qazaqstandyq turǵyn úı kompanııasynyń» kepildigi arqasynda apatty jáne tozyǵy jetken turǵyn úıler turǵyndarynyń quqyqtary qurylys aıaqtalǵanǵa deıin tolyq qorǵalady.
Bul tetik azamattar men ınvestorlardyń renovatsııa baǵdarlamalaryna degen senimin arttyrady. Úleskerler salynyp jatqan turǵyn úıdi satyp alý úshin ekinshi deńgeıli bankterdiń ıpotekalyq nesıesin paıdalana alady. Al qurylys salýshylar bos turǵyn alańdary boıynsha úleskerlerdiń qarajatyn tartý múmkindigine ıe bolady.
Sonymen qatar jańa tetik jeke ınvestıtsııalardy yntalandyryp, memlekettik bıýdjetke túsetin júktemeni azaıtady. Respýblıkalyq deńgeıde renovatsııanyń quqyqtyq negizi qalyptasyp, turǵyn úı qory zamanaýı standarttarǵa sáıkes jańartylyp, azamattardyń jaıly ómir súrýine qolaıly jaǵdaı jasalady.
Budan bólek, ınjenerlik-kommýnıkatsııalyq ınfraqurylymdy júrgizýge jumsalatyn bıýdjet shyǵystary ońtaılandyrylady. Sebebi renovatsııalanatyn nysandar, ádette, qalalardyń tartymdy aýdandarynda ornalasqan jáne qajetti ınjenerlik jelilermen qamtamasyz etilgen.
Aıta keteıik, Qazaqstanda apatty turǵyn úılerdi renovatsııalaýdyń jańa tetigi iske qosyldy.
