Apattar medıtsınasy: Qazaqstanda 2018 jyly 1400 adam qutqaryldy
ASTANA. QazAqparat - 2018 jyl boıyna Medıtsınalyq apattar ortalyǵynyń qyzmetkerleri medıtsınalyq kómek kórsetý maqsatynda 2 myń ret saparǵa shyǵyp, 1400 adamdy qutqarǵan. Qutqarylǵan adamdardyń 300-i emdeý mekemelerine jetkizilgen, dep habarlaıdy QazAqparat tilshisi QR ІІM Tótenshe jaǵdaılar komıtetiniń baspasóz qyzmetine silteme jasap.
«Apattar medıtsınasy tótenshe jaǵdaılarǵa, atap aıtqanda iri órt jaǵdaılaryna, sý tasqynyna, jol-kólik oqıǵasyna tap bolǵan adamdarǵa kómek kórsetedi. Apattar medıtsınasy salasynda eńbek etetin dárigerler shuǵyl jaǵdaıda bir ýaqytta ondaǵan adamǵa kómek kórsetilýi tıis kezderge jıi tap bolady», - dep habarlady vedomstvodan.
Atalǵan qyzmet ókilderine mereke kúnderi de demalys joq. Ortalyqta jedel kezekshilikte shuǵyl áreket etý brıgadalary bar. Olardyń órt shyqqan, apat bolǵan, jol-kólik oqıǵasy tirkelgen oryndarǵa jetýi tıis ýaqyty - bar-joǵy 3-5 mınýt.
Ortalyqtyń medıtsınalyq qurylymdarynyń quramyna dárigerler men feldsherler ǵana emes, hırýrgtar, travmotologtar, anestezıolog-reanımatologtar men ózge de mamandar kiredi. Olar iri aýqymdaǵy tótenshe jaǵdaılarda avtonomdy dala gospıtalin - zardap shekkenderdi qabyldaýǵa jáne emdeýge arnalǵan mobıldi aýrýhanany quryp jiberýge qaýqarly.
Ortalyqtyń 40-qa tarta tasjol boıyndaǵy medıtsınalyq-qutqarý pýnkteri jol-kólik oqıǵalarynan zardap shekken jáne ózdigimen medıtsınalyq kómek alýǵa kelgen, emdeýin keıinge ysyrýǵa bolmaıtyn adamdarǵa kómektesedi. 4 aıdyń ishinde ǵana tasjol boıyndaǵy pýnktterge kezekshi brıgadalar 400 ret shyǵyp, jol-kólik oqıǵasynan zardap shekken myńǵa tarta adamǵa medıtsınalyq kómek kórsetken.
