Apattan kóz jumǵan baǵdarlamashy jigittiń qabirine iPhone-qulpytas qoıyldy
ASTANA. QazAqparat - Almatyda Keńsaı mazaryna jerlengen marqum Zańǵar Orynbetovtiń qabiriniń basyna ornatylǵan iPhone túrindegi qulpytas áleýmettik jelide qyzý talqyǵa tústi.
Zańǵardyń jaqyndary men dostary aıtylǵan synǵa jaýap berip, iOS-ázirleýshilerdiń búkilálemdik konferentsııasyna (WWDC) qatysqan jalǵyz qazaq, jas ǵalym Zańǵardyń eńbegin taǵy da eske aldy.
Zańǵar Orynbetov 12 qyrkúıek kúni Prıozerskte jol apatynan mert boldy. Ol bar bolǵany 23 jasta edi.
«Keshe bizdiń oqytýshy (Súleıman Demırel atyndaǵy ýnıversıtet) Zańǵar Orynbetov jol apatynan kóz jumdy. Bul fotoda ol Apple basshysy Tım Kýkpen birge túsken», - dep jazdy Instagram jelisine Meırambek Japarov.
Oqıǵadan beıhabar jurt áýelde buny túsinbeı, synǵa alǵan edi. Olarǵa Zańǵardyń ápkesi, jýrnalıst Bella Orynbetova Feısbýktegi paraqshasynda jaýap berdi.
«Zańǵar IOs júıesine arnap mobıldi qosymshalar jasaıtyn. Apple kompanııasyn jaqsy kóretin. Óz jumysynyń kópshiligin de soǵan arnady. Jazda Apple kompanııasynyń WWDC 2016 jazǵy mektebine joldama alyp, baryp qaıtqan. Sońǵy jumysy iPhone / iPad-qa arnalǵan qazaqsha ıntellektýaldy pernetaqta edi. Ómirden eń jaqyn adamyń ketkende onyń oralmasyn túısinseń de, burynǵydaı qýantqyń keledi. Zańǵardyń basyndaǵy qulpytasy - ákesi men anasynyń sońǵy "syılyǵy"», - dep jazdy ol. 
