Apatqa ushyraǵan ushqysh Almaty oblysyndaǵy týǵan aýylynda jerlendi
TALDYQORǴAN.QazAqparat - Senbi kúni Almatyda apatqa ushyraǵan AN-26 áskerı ushaǵynda qaza tapqan Ǵabıt Barlyqbaevty búgin jaqyndary aqtyq saparǵa shyǵaryp saldy. Avıatsııa bóliminiń shtýrmany týra múshel jasynda ómirden ozdy. 36 jastaǵy azamattyń artynda 3 balasy, jary, ata-anasy qaldy, dep habarlaıdy QazAqparat tilshisi.
«Ózderi aıdaıtyn áskerı ushaqtardyń daýysyn balalaryna, maǵan úıretip qoıǵan. Eger biz daýysyn bilmeı qalsaq, qalaısha meniń júrgizetin ushaǵymnyń daýysyn bilmeısiń dep renjıtin. Biz úıde otyryp, ushaqtyń daýysyna qarap biletinbiz. Mine AN-24, mine AN-26 kele jatyr dep. Ózi úshyp kele jatqanda qońyraý shalyp, aıtatyn, balalardy balkonǵa shyǵarshy, men ushyp kele jatyrmyn dep», - dep jaryn eske alady Gúlzıra Ormanbekova.
Ushaq apatynda qaza tapqan ushqysh Ǵabıt Barlyqbaev úsh aǵaıyndy eken. Ózi úıdiń tuńǵyshy bolǵan. Ushqysh bolýdy bala kúninen arman etken azamat Aqtóbede bilim alyp, otan qorǵaý salasynda 20 jylǵa jýyq qyzmet etti. Ushqyshtyń artynan ergen eki inisi de áskerı qyzmette.
«Úsh ulymdy da Otanyna, halqyna qyzmet et dep berdim. Úsheýi de áskerı qyzmetker. Onyń ekeýi ushqysh. Balalaryma rızamyn. Halqynyń úmitin aqtap jatyr, bergen anttaryna adal»,- dedi marqum Ǵabıt Barlyqbaevtyń ákesi Esim Barlyqbaev.
Boraldaı kentinde qyzmet etken ushqyshtyń denesi ózi týǵan Taldyqorǵan mańyndaǵy Baqtybaı aýylynda jer qoınyna tapsyryldy. Ǵabıt Barlyqbaevtyń úlken balasy 9 da bolsa, kishkentaı 2-aq jasta.
