Apatqa ushyraǵan ushaqtan avıatsııalyq otyndy qotarý jumystary júrgizilip jatyr
Bul jaıynda QR ІІM Tótenshe jaǵdaılar komıtetinen málim etti, dep habarlaıdy QazAqparat tilshisi.
Vedomstvo málimetinshe, janýarlar jáne ósimdikti qorǵaý qyzmetkerleri ushaq qulaǵan aýmaqta veterınarlyq-sanıtarlyq tekserý jumystaryn júrgizgen. Nátıjesinde Talǵar aýdanyna qarasty Gúldana eldi mekeniniń jeke sektor aýmaǵynda jáne ushaq qulaǵan jerde ólgen janýarlardyń óleksesi tabylǵan joq. Atalǵan aýmaqtaǵy epızootıkalyq ahýal qolaıly.
«QR ІІM Tótenshe jaǵdaılar komıtetiniń qutqarýshylary Almaty qalalyq qutqarý qyzmeti qutqarýshylarymen birge tótenshe oqıǵa bolǵan jerde gıdravlıkalyq quraldardyń kómegimen ushaqty bólshekteý jumystaryn júrgizip jatyr. Sonymen qatar áýe kemesiniń oń jaq qanatyndaǵy baktan avıatsııalyq otyndy qotarý jumystary da júrgizilýde. 1 tehnıka (áýejaıdyń 8 tonnalyq benzovozy) men 4 maman jumyldyrylǵan. Saǵat 17-00-degi jaǵdaı boıynsha baktaǵy 4 875 lıtr avıatsııalyq otynnyń 2 myń lıtri qotaryldy. Órt shyǵýyna jol bermeý úshin kóbik atqylaýǵa ATs-5 jáne ATs-8 órt sóndirý tehnıkasy qoıylǵan», - dep atap ótedi komıtetten.
Taratylǵan aqparatqa qaraǵanda, TJK jedel shtabynda ІІM, IIDM, DSM, EM, Ulttyq ulan ókilderi júr. Shuǵyl psıhologııalyq kómek kórsetý úshin qaýyrt jeli telefondarynyń jumysy uıymdastyrylǵan. Saǵat 17-00-degi jaǵdaı boıynsha qaýyrt jelige 1 344 qońyraý túsken.
«TJK psıhologtary zardap shekken 69 azamattyń týystaryna, Densaýlyq saqtaý mınıstrliginiń psıhologtary statsıonarlyq em alyp jatqan 47 zardap shegýshige pshologııalyq kómek kórsetti», - delingen taratylǵan aqparatta.
