Apatqa ushyraǵan «Progress» ǵarysh kemesiniń synyqtary tabyldy

ASTANA. QazAqparat - Reseılik TJM jedel toby «Progress» ǵarysh júk kemesiniń synyqtaryn Týva Respýblıkasynyń astanasy Qyzyldyń batysynda 120 shaqyrym qashyqta ornalasqan aýyldyń mańynan tapty, dep habarlady RIA Novostı.

TJM resmı ókili Lýıza Sevıldiń aıtýynsha, Ýlýg-Hemsk aýdanynyń jergilikti turǵynynan Tos-Tevek mekenindegi Eılıg-Hem aýylynan 15 shaqyrym qashyqtyqta dóńgelek pishindi metall zattyń tabylǵany týraly aqparat kelip túsken.

Órt sóndirý garnızony jedel tobynyń málimdeýinshe, taý bókterinde dıametri 90 santımetrlik synyqtar tabylǵan.

«Progress-MS-04» kemesimen baılanysty oqıǵa beısenbi kúni keshke oryn alǵan. Ǵarysh kemesi Tývanyń turǵyn joq taýly aımaǵynda apatqa ushyrap, qurylǵynyń kóp bóligi aýada janyp ketken.