Apatqa ushyraǵan MıG-31 shyǵynyn reseılik zaýyt óteıdi - QR Qorǵanys mınıstrligi

ASTANA. 25 sáýir. QazAqparat - Qaraǵandynyń túbinde apatqa ushyraǵan MIG-31B ushaǵynyń shyǵynyn reseılik zaýyt óteıdi.

Búgin Astanada ótken baspasóz-máslıhatynda QR Qarýly Kúshteri Áýe qorǵanysy kúshteriniń Bas qolbasshysy Aleksandr Sorokın osylaı aıtty.

Aıta keteıik, ótken jyly jeltoqsan aıynda MIG-31B ushaǵy Reseıdiń Rjevsk qalasyndaǵy «514-m» zaýytynda kúrdeli jóndeýden ótken bolatyn. Osydan keıin zaýyt atalǵan tehnıkanyń durys jumys isteýine eki jyl kepildik bergen.

«Ondaıda barlyq agregattarǵa plomba salynady. Biz ushaqtyń ishki qurylysyna aralasa almaımyz. Sondyqtan kepildik berilgen eki jyldyń ishinde barlyq kemshilikterge zaýyt jaýap beredi. Ol apatqa da jaýapty. Sol sebepti olar barlyq shyǵyndy óteýge mindet», - dep atap kórsetti A.Sorokın.

Alaıda Áýe qorǵanysy kúshteriniń Bas qolbasshysy kepildik sommasyna qatysty naqty aqparat bere almady.