Apatqa ushyraǵan «Kosta Konkordıa» kemesinen qutqarylǵan qazaqstandyqtar Rımde saılaýǵa qatysýda
ASTANA. 15 qańtar. QazAqparat /Qanat Mámetqazyuly/ - Italııanyń jaǵalaýyndaǵy Jerorta teńizinde qaıyrǵa turyp qalyp, apatqa ushyraǵan «Kosta Konkordıa» krýızdik kemesiniń bortynda Qazaqstannyń úsh azamaty bolǵan edi.
Keme apatqa ushyraǵannan keıin Qazaqstan Elshiliginiń konsýldyq bólim qyzmetkerleri jerlesterimizben baılanys ornatty.
«Qazaqstan azamattarynyń shetelderde quqy men múddesin qorǵaý sheńberinde, sondaı-aq keme bortynda basqa da jerlesterimizdiń bolý múmkindigi týraly tolyq aqparat alysymen qazaqstandyq konsýldyq qyzmetkerleri apatqa ushyraǵan kemeniń qyzmetkerleri evakýatsııalanǵan Monte-Ardjentarıoǵa (Rımnen 170 shaqyrym) barǵan bolatyn. Monte-Ardjentarıo qalasyna kelisimen Qazaqstannyń taǵy da 4 azamatynyń japa shekkeni anyqtaldy. Olardyń barlyǵy Monte-Ardjentarıo men Fııýmıchıno qalalaryndaǵy qonaq úılerge ornalystyryldy», - delingen Syrtqy ister mınıstrliginiń resmı ókili Altaı Ábıbýllaev taratqan baspasóz habarlamasynda.
Onyń sózine qaraǵanda, qazaqstandyq dıplomattar atalǵan apatty jaǵdaı boıynsha Qazaqstannyń 7 azamatynyń jeke bastary týraly málimetterdi anyqtady. Olar: Ageev Rýstam, 12.09.1968 j.; Ageeva Lola, 24.05.1984 j.; Barbasheva Vıktorııa, 07.04.1983 j.; Rıadnova Kıra, 30.09.1978 j.; Korsýnskıı Aleksandr, 13.01.1979 j.; Korsýnskıı Vladımır, 14.02.1981 j.; Korsýnskaıa Natalıa, 12.03.1955 j.
SІM resmı ókiliniń habarlaýynsha, qazaqstandyqtardyń jaǵdaıy qanaǵattanarlyq, olardyń ómiri men densaýlyǵyna esh qaýip joq, tek aqsha qarajattary men jeke zattary keme bortynda qalǵan. Konsýldyq qyzmetkerleri apatqa ushyraǵan kemeniń operatory bolyp tabylatyn «Costa Cruises» ókilderimen, jergilikti bılik ókilderimen jáne jaǵalaý kúzetimen kezdesý ótkizip, áńgimelesti. «Dıplomattarymyzdyń kómegimen qazaqstandyqtar Rımge oraldy. Olarǵa Elshilik barlyq qajetti kómekterdi kórsetti. Qazirgi kezde keme apatynan qutqarylǵan Qazaqstan azamattary Rımdegi Qazaqstan Elshiligi janynan qurylǵan saılaý ýchaskesinde daýys berýge qatysýda. Olar 15 qańtar kúni keshke Ystambul arqyly Qazaqstanǵa keledi. Týroperatorlar olardyń jol shyǵyndaryn óteıtin bolady», - deıdi A. Ábıbýllaev.
Esterińizge sala keteıik, 17 palýbalyq ıtalıandyq «Kosta Konkordıa» kemesi 13 qańtar kúni jergilikti ýaqyt boıynsha saǵat 10 shamasynda Djılo aralyna jaqyn jerde qum qaırańynda saıazǵa otyryp qaldy. Qolda bar málimetter boıynsha, soqqy kezinde kemeniń korpýsy búlinip, qısaıǵan. Apat kezinde onyń bortynda 3200-ge jýyq jolaýshy men myńnan astam ekıpaj músheleri boldy.
Buǵan deıin BAQ-tar oqıǵanyń segiz qurbany týraly habarlaǵan bolatyn.
