Apatqa ushyraǵan Sý-30SM ushaǵy 230 saǵat qana ushqan

ASTANA. KAZINFORM — Qaraǵandy oblysynda oqý-jattyǵý kezinde apatqa ushyraǵan SÝ-30SM ushaǵy áýede 230 saǵat qana ushqan. Bul týraly Qorǵanys mınıstri Dáýren Qosanov aıtty.

— Jańa ushaq. Ushqyshtan qatelik bolǵan joq. Tergeý ótip jatyr. Sonyń nátıjesin jarııalaımyz. Reseıde shyǵarylǵan Sý-30SM joıǵysh ushaǵy 2022 jyly jetkizilgen. Eń bastysy ushqyshtar aman qaldy. Ushaq 230 saǵat ushqan, — dedi ol Aqordada BAQ ókilderiniń saýalyna oraı.

Esterińizge sala ketsek, 25 aqpan kúni Qaraǵandy oblysynda josparly oqý-jattyǵý ushýlary barysynda Sý-30SM joıǵysh ushaǵy apatqa ushyrady.

— Ushaq ekıpajy der kezinde katapýlt jasady. Ushqyshtar din aman, olardyń ómiri men densaýlyǵyna qaýip joq. Qazirgi ýaqytta medıtsınalyq mamandardyń baqylaýynda, — delingen Qorǵanys mınıstrliginiń habarlamasynda.