Apatqa ushyraǵan Raısı tikushaǵy: qaıǵyly oqıǵanyń tyń mán-jaıy aıtyldy
ASTANA. KAZINFORM – Iran Prezıdenti ákimshiliginiń basshysy Rolam Hýseın Esmaılı el Prezıdenti Raısı mingen tikushaqpen qatarlasa ushqan áýe kemesinde bolǵan. Ol qaıǵyly oqıǵaǵa qatysty tyń mán-jaıdy aıtyp berdi.
Onyń aıtýynsha, tikushaqtar áýege kóterilgen kúni – dúısenbide kún raıy óte qolaıly bolǵan. Degenmen, tikushaq ushqannan soń shamamen 1,5 saǵatta Shyǵys Ázerbaıjan ólkesindegi Sýngýn mys kenishi shahtasyna taqaý tusta bult baıqalǵan.
«Ushyp shyqqannan keıin 1,5 saǵattan soń Sýngýn mys keni tusynda bult baıqaldy. Tuman bolǵan joq. Múmkin shatqaldyń tómengi jaǵynda tuman bolǵan da shyǵar. Alaıda bizdiń ushý traektorııamyzda tuman bolǵan emes. Bult tikushaqtan birshama joǵary boldy. Prezıdent mingen tikushaqtyń ushqyshy komandır retinde bizge joǵary kóterilip, bulttardyń ústimen ushýdy jalǵastyrýǵa nusqaý berdi», - dedi Esmaılı.
Ákimshilik basshysynyń sózine qaraǵanda, tikushaq bulttardyń ústimen 30 sekýnd ushqan kezde Prezıdent mingen áýe kemesi kózden tasa bolǵan. Al qatarlasyp kele jatqan tikushaq ushqyshy prezıdenttik tikushaq qonýǵa májbúr boldy dep boljam jasap, sol aýdandy birneshe ret sholyp shyqqan. 1,5 mınýt boıy eshqandaı baılanys bolmaǵan. Sol kezde ǵana prezıdenttik Bell 212 tikushaǵynyń apatqa ushyraý múmkindigine qatysty boljam jasalyp, Esmaılı mingen áýe kemesi Sýngýn kenishi tusyna qonǵan.
«Maǵan tikushaqtyń apatqa ushyraýy múmkin ekendigin aıtty. Óıtkeni, 1,5 mınýt boıy baılanysqa shyǵa almadyq. Ushaǵymyz birneshe ret aınala ushyp, radıobaılanys ornata almady. 30 sekýndtan keıin Sýngýn shahtasyna qondyq», - dep málimdedi Iran Prezıdenti ákimshiliginiń basshysy.
Prezıdent keńsesiniń basshysy tikushaq qonǵannan keıin de apatqa ushyraǵan áýe kemesi bortynda bolǵan jolaýshylarmen baılanysqa shyǵýǵa tyrysqanymen eshqandaı jaýap bolmaǵan. Sodan keıin oǵan kapıtan Mýstafabıdiń uıaly telefonyna habarlasý múmkin bolǵanyn, qońyraýǵa ál-Hashemı (Iran Joǵarǵy kóshbasshysynyń Shyǵys Ázerbaıjandaǵy ókili Seıed Mohammed Álı ál-Hashemı) jaýap bergenin jetkizgen. Ál-Hashemı shatqalǵa qulap ketkenin aıtqan. Biraq, ne bolǵany jaıly aıta almaǵan.
«Ózimdi jaısyz sezinip turmyn. Ne bolǵanyn bilmeımin. Aǵashtardyń astyndamyn, eshkimdi kórip turǵan joqpyn, jalǵyzbyn», - dep jaýap bergen qońyraýǵa ál-Hashemı.
Onyń sózinen prezıdenttik Bell 212 tikushaǵynyń qulaǵany belgili bolǵan. Imam mert bolǵanǵa deıin birneshe saǵat baılanysqa shyǵyp otyrǵan. Sál keıinirek, tikushaq jolaýshylary men ekıpaj músheleri birden, al ál-Hashemı birneshe saǵattan keıin qaza tapqany anyqtaldy. Jarylys daýysy estilmegen, qyzyl jalyn, tútin baıqalmaǵan.
Esmaılıdiń aıtýynsha, saǵat 15:30-ǵa deıin aýa raıy ushaqtyń ushýyna qolaıly bolǵan.
«Bultty shatqaldardyń birinen ári óte shekteýli aımaqtan ǵana baıqadyq. Sondyqtan da ol ushýǵa kedergi faktor bolǵanyn ne bolmaǵandyǵyn aıta almaımyn», - dedi Esmaılı.
