Apatqa ushyraǵan AZAL ushaǵynyń «qara jáshikteri» zerttelip, Qazaqstanǵa jóneltildi

ASTANA. KAZINFORM — Brazılııanyń avıatsııalyq oqıǵalardy tergeý jáne aldyn alý ortalyǵy Azerbaijan Airlines (AZAL) kompanııasy ushaǵynyń ózdiginen jazǵysh quraldaryn (qara jáshikter) zertteýdi aıaqtady.

Bul týraly TASS aqparat agentigi málim etti. 

Atap aıtqanda, osy jaıynda brazılııalyq G1 portalyna atalǵan vedomstvodan habarlaǵan. 

— Ushaqtaǵy ózdiginen jazǵysh eki quraldaǵy derekterdi jınaqtaý jáne tekserý jumystary aıaqtaldy, — delingen taratylǵan aqparatta. 

Sonymen birge, O Globo gazeti vedomstvonyń Qazaqstan bıligine tıisti aqparatty jiberip qoıǵanyn jazyp otyr.

Eske salsaq, Aqtaýda Azerbaijan Airlines ushaǵy apatqa ushyrady.

Ushaq bortynda 67 adam, onyń ishinde bes ekıpaj múshesi bolǵan. Oqıǵa saldarynan 38 jolaýshy qaza tapty. Ókinishke qaraı, mert bolǵan jandardyń arasynda 6 Qazaqstan azamaty bolǵan.

Buǵan deıin Aqtaý túbindegi ushaq apatynyń sebepteri qashan naqty aıtylatyny belgili bolǵan edi.

30 jeltoqsanda Qazaqstan borttaǵy ózdiginen jazǵysh quraldardy Brazılııaǵa jibergenin jazdyq.

Osyǵan deıin «qara jáshiktiń» Brazılııaǵa nelikten jiberiletindigi týraly sarapshylardyń pikirin bergen edik.

Sondaı-aq, «qara jáshikti» oqýǵa neshe kún ketetini týraly avıatsııa ınjeneriniń jaýabyn jarııaladyq.

Budan bólek, Aqtaý túbinde qulaǵan ázerbaıjandyq ushaqtyń eksklıýzıvti sýretteri jarııalandy.